ڈیرہ اسماعیل خان میں سیکیورٹی فورسز نے کامیاب کارروائیاں کر کے مجموعی طور پر 27 دہشت گرد ہلاک کر دیے۔

پاک فوج کے شعبہ تعلقات عامہ (آئی ایس پی آر) کے مطابق سیکیورٹی فورسز نے ڈیرہ اسماعیل کے مختلف علاقوں میں کارروائی کی جس کے دوران مجموعی طور پر 27 دہشت گرد ہلاک کیے گئے۔

آئی ایس پی آر کے مطابق چھ دہشتگردوں نے ڈی آئی خان کے علاقے دربان چیک پوسٹ پر حملہ کیا، دہشت گردوں نے بارود سے بھری گاڑی چیک پوسٹ سے ٹکرائی اور بعد ازاں خود کو بھی اڑا دیا، دھماکے کے باعث 23 سیکیورٹی اہلکار شہید ہو گئے۔

دوسری جانب سیکیورٹی فورسز نے درہ زندہ میں انٹیلی جنس بیسڈ آپریشن کیا جس کے دوران 17 دہشتگرد مارے گئے۔

اس کے علاوہ سیکیورٹی فورسز نے کلاچی میں بھی انٹیلی جنس بیسڈ آپریشن کیا جس کے دوران دو سیکیورٹی اہلکار بہادری سے لڑتے ہوئے شہید ہوئے اور 4 دہشتگرد ہلاک ہوئے۔

مارے گئے دہشت گرد سیکیورٹی فورسز کے خلاف دہشت گردی کی متعدد کارروائیوں کے ساتھ ساتھ معصوم شہریوں کے قتل میں بھی سرگرم تھے جن سے اسلحہ، گولہ بارود اور دھماکہ خیز مواد بھی برآمد کیا گیا ہے۔