امیر جماعت اسلامی سراج الحق نے کہا ہے کہ پاکستان کی محرومیوں کا ذمہ دار اور کوئی نہیں بلکہ ملک کی تین بڑی جماعتیں ہی ہیں۔

تفصیلات کے مطابق سراج الحق نے تحریک انصاف چھوڑ کر جماعت اسلامی میں شمولیت اختیار کرنے والے جاوید قریشی کی رہائش گاہ پر خطاب کرتے ہوئے کہا کہ پاکستان کی محرومیوں کے ذمہ دار امریکہ برطانیہ فرانس یا کوئی غیر ملکی طاقت نہیں بلکہ پاکستان کی تین بڑی جماعتیں ہیں، جماعت اسلامی اقتدار میں آئی تو ان جماعتوں کی قیادت کی پیٹ پھاڑ کر اور ان کی انتڑیوں سے قوم کا لوٹا پیسہ نکالے گی۔

امیر جماعت اسلامی نے کہا کہ ملک کے ہر شہری کو انصاف ملنا چاہیے، سوال یہ ہے کہ قانون کی بالادستی کے راستے میں کون رکاوٹ ہے؟ کسی عام آدمی نے پاکستان کو تباہ نہیں کیا اس ملک کے گھر کو آگ گھر کے چراغ سے لگی ہے، مسلم لیگ ن نے پچیس سال پنجاب پی پی پی پندرہ سال پی ٹی آئی نو سال اقتدار میں رہیں، ان تینوں بڑی جماعتوں نے پاکستان کو غربت اور جہالت کا تحفہ دیا ہے۔

سراج الحق نے کہا کہ ان جماعتوں نے ملک کو برباد کر کے رکھ دیا ہے، اس ملک میں سونا یورینیم زراعت پانچ دریا سب کچھ موجود ہے مگر 80 ہزار ارب روپے کا قرض کیوں ہے؟ سات کروڑ نوجوان ملازمت سے محروم کیوں ہیں؟