دہشت گردوں کی فائرنگ سے جام شہادت نوش کرنے والے شہید نائیک عبدالرؤف کی نماز جنازہ ادا کردی گئی ہے۔

پاک فوج کے شعبہ تعلقات عامہ (آئی ایس پی آر) کے مطابق شمالی وزیرستان میں افغانستان کی جانب سے پاکستان کی فوجی چوکی پر دہشت گردوں کی فائرنگ سے جام شہادت نوش کرنے والے نائیک عبدالرؤف شہید کی نماز جنازہ ادا کردی گئی۔

آئی ایس پی آر کا کہنا ہے کہ 31 سالہ شہید نائیک عبد الرؤف کو مکمل فوجی اعزاز کے ساتھ ان کے آبائی علاقے رحیم یار خان میں سپرد خاک کردیا گیا ہے۔

پاک فوج کے شعبہ تعلقات عامہ کے مطابق نماز جنازہ میں شہید کے اہلخانہ، عزیز و اقارب، پاک فوج کے افسران، عمائدینِ علاقہ اور لوگوں کی کثیر تعداد نے شرکت کی جب کہ نائیک عبدالرؤف شہید نے سوگواران میں والدین، بہن، اہلیہ اورایک بیٹا چھوڑا ہے۔

ترجمان پاک فوج  کا مزید کہنا ہے کہ پاک فوج کے بہادر جوانوں کی قربانیاں دہشت گردی کے خلاف جنگ میں ہمارے عزم کو مزید تقویت دیتی ہیں، مادرِ وطن سے دہشت گردی کے ناسور کے خاتمے تک ہماری جنگ جاری رہے گی۔