اسلام آباد: الیکشن کمیشن نے لاہور کے حلقہ این اے 130 سے ہارنے والی امیدوار یاسمین راشد کی درخواست پر نواز شریف کو طلبی کا نوٹس جاری کر دیا۔

سماعت کے دوران پی ٹی آئی رہنما یاسمین راشد کے وکیل نے کہا کہ رات کو ساڑھے دس بجے پولیس افسر آر او کے دفتر میں داخل ہوئے، اس وقت فارم 47 مرتب کیا جا رہا تھا۔

وکیل نے بتایا کہ ہمارے پولنگ ایجنٹ کو باہر نکال دیا گیا، آر او کو رات کے وقت تبدیل کر دیا گیا، رزلٹ نئے آر او سے تیار کروایا گیا۔

یاسمین راشد کے وکیل  نے کہا کہ 376 پولنگ اسٹیشنز میں سے 334 کے فارم 45 کے مطابق یاسیمن راشد بیس ہزار ووٹ سے جیت رہی تھیں، یہ اعلان تمام ٹی وی چینلز پر چل رہا تھا۔

دوران سماعت وکیل نے مزید کہا کہ نواز شریف کو 33 پولنگ اسٹیشنز سے 1 لاکھ 1 ہزار ووٹ دلوائے گئے، یہ بہت بڑی دھاندلی کا کیس ہے۔

الیکشن کمیشن نے کیس میں نواز شریف کو نوٹس جاری کر دیا اور ریٹرننگ افسر سے رپورٹ طلب کرلی۔

ممبر الیکشن کمیشن نے ریمارکس دیے کہ اس کیس میں تو الیکشن کمیشن بھی جوابدہ ہے، ہم اپنے خلاف کیس سنیں؟

الیکشن کمیشن نے آر او سے رپورٹ طلب کرتے ہوئے کیس کی سماعت 27 فروری تک ملتوی کردی۔