اسلام آباد: صدر مملکت ڈاکٹر عارف علوی نے کہا کہ تنازع کشمیر کا منصفانہ حل ہماری خارجہ پالیسی کا کلیدی ستون رہے گا۔

صدر مملکت عارف علوی نے 5 فروری یوم یکجہتی کشمیر کے موقع پر اپنے پیغام میں کہا کہ کشمیر کے عوام 76 سال سے حق خودارادیت کی جدوجہد کررہے ہیں، پاکستان کشمیریوں کی غیر متزلزل حمایت کی تجدید کرتا ہے۔

انہوں نے کہا کہ حق خودارادیت بین الاقوامی قانون کا بنیادی اصول ہے، اقوام متحدہ حق خودارادیت کے حصول کی واضح حمایت کرتا ہے، اقوام متحدہ کی جنرل اسمبلی ہرسال قرارداد منظور کرتی ہے، کشمیری اس ناقابل تنسیخ حق سے ابھی تک محروم ہیں۔

عارف علوی نے کہا کہ کشمیر دنیا کے سب سے زیادہ عسکریت زدہ علاقوں میں سے ایک ہے، کشمیری دہشت کے ماحول میں جی رہے ہیں، بھارتی افواج نے طاقت کے استعمال کا بازار گرم کررکھا ہے، سیاسی کارکنوں،انسانی حقوق کے محافظوں کوح راست میں لیا جارہا ہے، سیاسی کارکنوں کو جائیدادوں کی ضبطی کا سامنا ہے۔

انکا کہنا تھا کہ کشمیریوں کی نمائندگی کرنے والی جماعتوں پرپابندی لگائی جارہی ہے، بھارتی جابرانہ اقدامات کا مقصد کشمیر میں اختلاف رائے کو کچلنا ہے، بھارت کشمیر پر اپنے قبضے کو مستحکم کرنے کے لیے اقدامات کررہا ہے۔

صدر نے کہا کہ 5 اگست 2019 کے غیرقانونی اقدامات کا مقصد آبادیاتی تبدیلیاں لانا ہے، بھارت کشمیریوں کو ایک بےاختیار کمیونٹی بنانا چاہتا ہے، بھارتی سپریم کورٹ کا فیصلہ حق خودارادیت دبانے کے لیے ہے۔

انہوں نے کہا کہ بھارت کو کشمیر میں انسانی حقوق کی خلاف ورزیاں بند کرنا ہوں گی، بھارت 5 اگست 2019 کے یکطرفہ اورغیرقانونی اقدامات کو واپس لے، بھارت کو ظالمانہ قوانین کومنسوخ کرنا ہوگا، بھارت کو یواین سے منظور شدہ تحقیقات کی اجازت دینا ہوگی۔

عارف علوی نے مزید کہا کہ بھارت کشمیر پر اقوام متحدہ کی قراردادوں پرعملدرآمد کرے، تنازع کشمیر کا منصفانہ حل ہماری خارجہ پالیسی کا کلیدی ستون رہے گا، پاکستان کشمیریوں کے حق خودارادیت کی حمایت جاری رکھے گا، پاکستان کشمیریوں کی اخلاقی، سفارتی اور سیاسی حمایت جاری رکھے گا۔