وزیراعلیٰ بلوچستان میرسرفرازبگٹی نے چمن میں بارشوں کےدوران ہلاکتوں پرافسوس کا اظہار کیا ہے، مختلف حادثات میں خواتین اوربچوں سمیت7افرادکےجاں بحق ہونےپرانھوں اظہارتعزیت کیا۔ 

وزیراعلٰی بلوچستان کا کہنا ہے کہ ناگہانی آفت میں قیمتی جانوں کےضیاع پردلی رنج ہوا، دکھ کی اس گھڑی میں غمزدہ خاندانوں کےساتھ ہیں۔

میرسرفراز بگٹی نے ہدایت کی کہ تمام متعلقہ ادارے ضلعی انتظامیہ مستعد رہیں۔

وادی کوئٹہ سمیت بلوچستان کے مختلف اضلاع میں مسلسل ایک ہفتے سے بارش جاری ہے۔ مسلسل بارشوں نے کوئٹہ سمیت بلوچستان کے دو درجن اضلاع میں تباہی مچادی۔

صوبے کے دیگرعلاقوں میں بارشوں کے باعث کھڑی فصلوں اور باغات کو شدید نقصان پہنچا ہے، کوئٹہ کو زیارت سے ملانے والی شاہراہ لینڈ سلائیڈنگ کے باعث ٹریفک کے لئے بند ہوگئی۔

اسی طرح کوئٹہ کو سندھ سے ملانے والی شاہراہ پر سال دو ہزار 22 کے سیلاب میں بہہ جانے والے پنجرہ پل کے مقام پر قائم کی گئی عارضی گزرگاہ پانی میں بہہ جانے سے ٹریفک معطل ہوئی۔

آسمانی بجلی گرنے سے سوراب، ڈیرہ بگٹی اور لورالائی میں پانچ افراد جبکہ چھتیں گرنے سے تین افراد جاں بحق ہوئے۔

حالیہ بارشوں سے صوبے کے ساحلی علاقے شدید متاثر ہوئے ہیں، کیچ اور گوادر صورتحال زیادہ خراب ہوئی۔ صوبے کے بیشترنشیبی علاقے بھی زیرآب آئے۔