سابق وفاقی وزیر داخلہ شیخ رشید احمد نے  پنجاب پولیس پر طنز کرتے ہوئے کہاکہ  ہمارے بچوں کو اٹھاتے ہیں اور خود ہیجڑوں سے مار کھاتے ہیں۔

 شیخ رشید احمد نے ڈسٹرکٹ کورٹ کے باہر میڈیا سے گفتگو کرتے ہوئے کہاکہ 9 مئی کے مجموعی طور پر 14 کیسز ہیں، جن کی سماعت اب 29 مئی کو اڈیالہ جیل میں ہوگی، ہم ان کیسز میں جرح کریں گے۔

انہوں نے کہاکہ بے نظیر نے ایک کیس بنایا تھا اور میں نے سات سال جیل کاٹی تھی، اتنے کیسز ہیں کہ ہر کیس کی ضمنی میں ہمیں ڈال دیا گیا ہے، یہ نالائق اور نا اہل ہیں، کشمیر میں ڈنڈے کے زور پر مطالبات منوانے گئے ہیں۔

 شیخ رشید نے کہاکہ ہمارے گھروں میں ریڈ کرتے ہیں، بچوں کو لے جاتے ہیں اور خود ہیجڑوں سے مار کھاتے ہیں ایک مہینے تین مرتبہ خواجہ سراؤں نے ان کی پٹائی کی ہے۔

پراپرٹی لیکس کے حوالے سے بات کرتے ہوئے انہوں نے کہاکہ پانامہ کے بعد دبئی لیکس آگئی ہے جو حکومت کے خلاف ہے۔

سابق وفاقی وزیر داخلہ  نے کہاکہ میں پاکستان میں نہیں تھا، ان لوگوں نے جن سے جھوٹی شہادتیں لی ہیں وہ جیل نہیں کاٹ سکتے تھے، ہم نے 40 40 دن کا سخت چلا کاٹا ہے۔

شیخ رشید نے کہاکہ میرا تعلق صرف بانی پی ٹی آئی سے ہے میں پی ٹی آئی میں شامل نہیں، میرا بانی پی ٹی آئی سے احترام کا رشتہ ہے،40 دن کے بعد 23 دن پھر 11 دن جیل میں رہا لیکن بانی پی ٹی آئی اور ان کی فیملی کے خلاف ایک بھی بیان نہیں دیا۔