اسلام آباد: وزیر اعظم محمد شہباز شریف ہیلی کاپٹر حادثے میں جاں بحق ہونے والے ایرانی صدر ابراہیم رئیسی اور وزیر خارجہ حسین امیر عبداللہیان کی تعزیت کے لیے آج ایران جائیں گے۔

ترجمان دفتر خارجہ کی جانب سے جاری کردہ بیان میں کہا گیا ہے کہ وزیراعظم شہباز شریف کے ساتھ نائب وزیراعظم اور دیگر سینیئر وزراء بھی ایران جائیں گے۔

وزیراعظم ایران کے روحانی پیشوا ایت اللہ علی خامنائی سے ملاقات کریں گے اور ان کی ایران کے قائم مقام صدر ڈاکٹر محمد مخبر سے بھی ملاقات ہوگی۔

ترجمان نے مزید بتایا کہ وزیراعظم شہباز شریف ایرانی قیادت کے ساتھ ملاقات میں پاکستان کی حکومت اور عوام کی طرف سے اظہار تعزیت کریں گے۔

واضح رہے کہ ایرانی میڈیاکی رپورٹ کے مطابق دو روز قبل ہیلی کاپٹر حادثے میں ایران کے صدر آیت اللہ ابراہیم رئیسی  اور وزیر خارجہ  حسین امیرعبداللہیان سمیت تمام افراد جاں بحق ہوگئے تھے۔

ہیلی کاپٹر حادثہ تبریز سے 100 کلومیٹر دور پیش آیا جس میں مشرقی آذربائیجان کے گورنر مالک رحمتی، ایرانی سپریم لیڈر آیت اللہ خامنہ ای کے ترجمان آیت اللہ علی الہاشم، فلائٹ کریو، سیکیورٹی چیف اور باڈی گارڈ بھی جاں بحق ہوئے۔