اسلام آباد: فری اینڈ فیئر الیکشن نیٹ ورک (فافن) نے قومی اسمبلی کے ابتدائی 100 دنوں کی کارکردگی پر رپورٹ جاری کر دی۔

فافن کی رپورٹ کے مطابق قومی اسمبلی کے مجموعی طور پر 23 دن اجلاس ہوئے، دورانیہ ساڑھے 6 گھنٹے رہا اور وزیراعظم شہباز شریف صرف دو اجلاس میں شریک ہوئے، قومی اسمبلی کے اجلاسوں میں وزیراعظم کی شرکت کا تناسب 10فیصد رہا۔

رپورٹ میں بتایا گیا کہ بانی پی ٹی آئی کا بطور وزیراعظم ابتدائی 100 دن میں حاضری کا تناسب 29فیصد رہا جبکہ مسلم لیگ (ن) کے صدر نواز شریف کا حاضری کا تناسب 26 فیصد تھا۔

فری اینڈ فیئر الیکشن نیٹ ورک کی رپورٹ میں کہا گیا کہ قائد حزب اختلاف عمر ایوب کی اجلاس میں شرکت 88 فیصد رہی، اسپیکر ایاز صادق اور ڈپٹی اسپیکر قومی اسمبلی کی حاضری کا تناسب 82 فیصد رہا جبکہ ابتدائی 100 روز میں 310 میں سے 159 ارکان اسمبلی نے متحرک انداز میں کارروائی میں حصہ لیا۔

فافن کی رپورٹ کے مطابق ارکان اسمبلی کی اوسط حاضری 230 اراکین اسمبلی پر مشتمل رہی، سنی اتحاد کونسل کے اراکین نے قومی اسمبلی کی کارروائی میں سب سے زیادہ حصہ لیا، سنی اتحاد کونسل کے وفاقی وزراء کی حاضری انتہائی کم رہی۔

رپورٹ میں کہا گیا کہ پارلیمنٹ میں قانون سازی کا عمل سست روی کا شکار رہا، قائمہ کمیٹیوں کی تشکیل میں تاخیر سے اسمبلی کی کارکردگی متاثر ہوئی، اجلاس میں شہریوں کی رسائی پر پابندیوں بھی کارکردگی پر اثر انداز ہوئی، ایوان میں اب بھی 26 ارکان کی کمی ہے۔

فافن کی رپورٹ میں مزید بتایا گیا کہ اسپیکر اور ڈپٹی اسپیکر نے 84 فیصد کارروائی کی صدارت کی، پوائنٹس آف آرڈر نے پلینری کے 30 فیصد وقت کا استعمال کیا۔