پاکستان تحریک انصاف (پی ٹی آئی) کے رہنما بابر اعوان کا کہنا ہے کہ فوری الیکشن کروائے جائیں جس میں یہ الیکشن کمیشن نہ ہو۔

 سپریم کورٹ کے باہر میڈیا سے گفتگو کرتے ہوئے بابر اعوان نے کہا کہ جنرل باجوہ اور الیکشن کمیشن کے خلاف کاروائی ہونی چاہیے، جبکہ بانی پی ٹی آئی  بار بار دہرا رہے ہیں کہ دوبارہ الیکشن کروایا جائے۔

بابر اعوان نے یہ بھی کہا کہ اس ساری گھمبیر صورتحال سے نکلنے کے لیے پاکستان کو عدم استحکام کرنے والے عناصر کے خلاف کاروائی کرنی چاہئے، جبکہ ایک چوری شدہ الیکشن کے تحت لوگوں کو حکومت سے نوازا گیا ہے۔

بابر اعوان نے کہا کہ الیکشن کمیشن نے سیٹوں کے معاملے میں جو زیادتی کی اس پر سپریم کورٹ کو کاروائی کرنی چاہیے، جبکہ سپریم کورٹ سے توقع ہے کہ قوم کو فیصلے سے راستہ ملنا چاہئے۔

بابر اعوان نے یہ بھی کہا کہ ہم جہاں بھی جاتے ہیں لوگ پوچھتے ہیں کہ عمران کب آئے گا، بانی پی ٹی آئی آئے گا تو ہی استحکام آئے گا، اس کے علاوہ انسانی حقوق، معیشت کے ادارے بھی اب بولنا شروع ہوگئے ہیں

بابر اعوان نے یہ بھی کہا کہ میں نہیں کہتا اپنے کپڑے فروخت کرو لیکن کم از کم ادارے فروخت نہ کرو، سویلین و نان سولین اسٹیبلشمنٹ گھر بیٹھے اور لوگوں کو ووٹ دینے دیں۔

بابر اعوان نے کہا کہ انقلاب کینیا میں آیا ہے پبلک پاور نے بجٹ صدر کے منہ پر مارا، اس کے علاوہ انقلاب میکرون کے خلاف بھی آیا ہے۔

بابر اعوان نے کہا کہ ہم پستول کے ذریعے نہیں ووٹ کے ذریعے انقلاب کے حامی ہیں، جبکہ اسٹیبلشمنٹ عوامی طور پر مجبور کو ہی پسند کرے گی، اس کے علاوہ 300  یونٹس تک بجلی مفت کی جائے۔