استحکام پاکستان پارٹی (آئی پی پی) نے دہشت گردی کے خلاف ہونے والے آپریشن “عزم استحکام” کی بھرپور حمایت کا فیصلہ کیا ہے۔

آئی پی پی پنجاب کی پارلیمانی پارٹی نے آپریشن عزم استحکام کے حق میں پنجاب اسمبلی میں قرارداد جمع کرا دی ہے۔

ایم پی اے و جنرل سیکریٹری آئی پی پی پنجاب شعیب صدیقی نے عزم استحکام کے لئے صوبائی اسمبلی میں قرارداد جمع کرائی جس میں کہا گیا کہ معیشت کی مضبوطی، خوشحالی اور سرمایہ کاری کے لئے دہشت گردی کا مکمل خاتمہ ضروری ہے۔

 قرارداد کے متن میں کہا گیا کہ تعلیم، صحت، روزگار اور جانی تحفظ کے کئے عزم استحکام آپریشن کے ساتھ ہیں،  پاکستان میں پائیدار امن، استحکام اور سلامتی کے لئے دہشت گردی کا خاتمہ ضروری ہے۔

شعیب صدیقی نے قرارداد میں کہا کہ وزیر اعظم میاں شہباز شریف کا مسلح کارروائیوں کے خلاف آپریشن وقت کی ضرورت ہے۔

قرارداد کے مطابق پنجاب اسمبلی کی رائے ہے کہ ملک دشمن عناصر اور ان کے سہولت کاروں کو جڑ سے اکھاڑ پھینکا جائے۔

قرارداد کے متن میں مزید کہا گیا کہ ایوان کا یہ بھی یقین ہے وطن عزیز کی حفاظت کے لئےجان نثار کرنے والوں کا خون رائیگاں نہیں جائے گا، پنجاب اسمبلی کا ایوان اعادہ کرتا ہے کہ قوم دہشت گردی کے خلاف متحد اور یکجان ہے۔