اسلام آباد: الیکشن کمیشن آف پاکستان نے انٹرا پارٹی انتخابات کیس میں پاکستان تحریک انصاف (پی ٹی آئی) کو دستاویزات جمع کروانے کے لیے مہلت دے دی۔

ممبر سندھ نثار درانی کی سربراہی میں تین رکنی کمیشن نے پی ٹی آئی انٹرا پارٹی الیکشن کیس کی سماعت کی۔ چیئرمین پی ٹی آئی بیرسٹر گوہر الیکشن کمیشن پہنچے۔

سماعت کے آغاز پر ممبر خیبر پختونخوا نے کہا کہ پی ٹی آئی اب ایک ادارہ نہیں ہے، ہم جاننا چاہتے ہیں وہ کونسی اتھارٹی ہے جس نے پارٹی الیکشن کروائے۔

چیئرمین پی ٹی آئی بیرسٹرگوہر خان نے کہا کہ تحریک انصاف کے حالیہ انٹرا پارٹی انتخابات پر الیکشن کمیشن کا کوئی اعتراض نہیں آیا، صرف چند تکنیکی اور قانونی سوالات ہیں جن کا ہم جواب دیں گے۔

اس موقع پر بیرسٹر گوہر نے الیکشن کمیشن سے دستاویزات جمع کروانے کے لیے مہلت مانگ لی اور کہا کہ سینٹرل سیکریٹریٹ سے پولیس تمام دستاویزات حتیٰ کہ واٹر ڈسپنسر بھی اٹھا کر لے گئی ہے۔

الیکشن کمیشن نے پی ٹی آئی کو دستاویزات جمع کروانے کے لیے مہلت دے دی

بعد ازاں الیکشن کمیشن نے پی ٹی آئی کو دستاویزات جمع کروانے کے لیے مہلت دیتے ہوئے کیس کی سماعت ملتوی کر دی جبکہ تاریخ کا اعلان بعد میں کیا جائے گا۔

واضح رہے کہ 13 جولائی کو الیکشن کمیشن آف پاکستان نے پی ٹی آئی انٹرا پارٹی الیکشن کیس سماعت کے لیے مقرر کیا تھا۔