اسلام آباد: وزیراعظم محمد شہباز شریف نے کہا ہے کہ آج یہ ثابت ہو گیا کہ پارلیمنٹ عظیم ہے۔

وزیراعظم شہباز شریف نے قومی اسمبلی اجلاس میں خطاب کرتے ہوئے کہا کہ 26 ویں آئینی ترامیم کی منظوری قومی اتفاق رائے کی شاندار مثال ہے، آج چارٹر آف ڈیموکریسی کا ادھورا خواب پایہ تکمیل کو پہنچا۔

انہوں نے کہا کہ ملک کے منتخب وزرائے اعظم کو گھر بھیج دیا جاتا تھا، اب ایسا نہیں ہوگا، پاکستان کی تاریخ میں آج کا دن عظیم دن ہے، آج یہ ثابت ہو گیا کہ پارلیمنٹ عظیم ہے۔

شہباز شریف نے کہا کہ ماضی میں جمہوری حکومتوں کا خاتمہ کیا گیا، لاکھوں لوگوں کو انصاف نہیں ملتا، ترامیم کے بعد انصاف کے حصول میں آسانی ہوگی،آج اراکین پارلیمنٹ نے پاکستان کے آئین میں ایسی ترامیم کی ہیں جن سے ان شاءاللہ ملک کا مستقبل محفوظ ہوگا۔

انکا کہنا تھا کہ چارٹر آف ڈیموکریسی کرنے والوں کو خراج تحسین پیش کرتا ہوں، شہید بے نظیر بھٹو اور قائد محمد نواز شریف نے چارٹر آف ڈیموکریسی کی بنیاد رکھی۔

وزیراعظم نے کہا کہ بلاول بھٹو نے آئینی ترامیم پر خلوص دل کے ساتھ محنت کی، مولانا فضل الرحمان کا بھی مشکور ہوں جنہوں نے پاکستان کے بہترین مفاد میں نہ صرف گفت و شنید کی بلکہ آگے بڑھ کر اپنا نقطہ نظر پیش کیا۔

انہوں نے مزید کہا کہ پورے ملک میں یہ پیغام گیا کہ پارلیمان میں موجود جماعتوں نے پاکستان کے لئے اپنے ذاتی مفاد کو قربان کیا، تمام جماعتوں نے آگے بڑھ کر 26 ویں ترامیم منظور کی جو پاکستان کی تاریخ میں سنگ میل کی حیثیت رکھے گی۔