تھرپارکر میں ایک ہی گھر سے پانچ افراد کی لاشیں برآمد ہوئی ہیں جن میں کم عمر بچے اور بچی بھی شامل ہیں۔

پولیس کے مطابق تھرپارکر میں بے رحم باپ نے ایک بیٹی، دو بیٹوں اور بیوی کو زہر دے کر خود بھی مبینہ طور خودکشی کی ہے، بچوں میں 11 سالہ گیتا، پانچ سالہ جسونت اور سات سالہ گلاب شامل ہیں۔

پولیس کا کہنا ہے کہ ہلاک ہونے والی خاتون پون بائی کی عمر 45 سالہ اور شوہر شنکر کی عمر 48سال ہے، جائے وقوعہ پر کسی قسم کا کوئی آلہ نظر نہیں آیا ہے جس سے واقعہ زہر خوانی کا لگتا ہے۔

ایس ایچ او نگر پارکر کے مطابق گھر کے سربراہ شنکر ٹھاکر کی نعش گھر میں پھندا لگی برآمد ہوئی ہے۔ گھر کا سربراہ شنکر پہلے ڈرائیور تھا اور کچھ دن پہلے گاؤں میں چھوٹا کیبن کھولا تھا۔

پولیس نے بتایا کہ شنکر کا گھر گاؤں کے باقی گھروں سے فاصلے پر ہے اور رات کے وقت وہ کیبن بند کر کے گھر پہنچا تھا۔

ایس ایچ او نگر پارکر نے مزید بتایا کہ لاشوں کو تعلقہ اسپتال نگر پارکر لایا گیا ہے جہاں پر پوسٹ مارٹم کیا جارہا ہے، پوسٹ مارٹم سے ہی موت کے اصل اسباب کا پتا چلے گا جب کہ یہ واقعہ انتہائی سنگین نوعیت کا ہے جس کی ہر رخ سے تفتیش کی جارہی ہے۔