کوئٹہ ریلوے اسٹیشن پر خودکش حملے کے شہداء کی نماز جنازہ کوئٹہ گیریژن میں ادا کر دی گئی ہے۔

پاک فوج کے شعبہ تعلقات عامہ (آئی ایس پی آر) کے مطابق نماز جنازہ میں آرمی چیف جنرل سید عاصم منیر، وزیر داخلہ، وزیراعلیٰ اور صوبائی وزراء نے شرکت کی۔

اس کے علاوہ نمازجنازہ میں عسکری وسول حکام کی بڑی تعداد بھی شریک ہوئی، شہداء کی تدفین کے بعد آرمی چیف نے سی ایم ایچ کوئٹہ کا دورہ کیا اور زخمیوں سے ملاقات بھی کی۔

یہ بھی پڑھیں؛ کوئٹہ میں ریلوے اسٹیشن کے قریب دھماکا، 24 افرادجاں بحق، 50 زخمی

اس موقع پر آرمی چیف جنرل عاصم منیر نے دہشت گردی کے خاتمے کے لیے قوم کے عزم کا اعادہ کیا اور کہا کہ دہشت گردی کے خاتمے کے مشن کو اجتماعی عزم کے ساتھ آگے بڑھایا جائے گا۔

انکا کہنا تھا کہ دہشت گردی کے خلاف جنگ کے لیے قوم کی مستقل حمایت کی ضرورت ہے، دہشت گردی کےخلاف قوم کاعزم مضبوط ہے۔

آرمی چیف نے مزید کہا کہ دہشت گردی کو کبھی برداشت نہیں کیا جائے گا، ان کا خاتمہ یقینی بنایا جائے گا، دہشت گردی کے خلاف جنگ کو منطقی انجام تک پہنچایا جائے گا، پُر امن اور خوشحال مستقبل کے لیے قوم کی حمایت کی ضرورت ہے۔

اس سے قبل کوئٹہ آمد پر کمانڈر بلوچستان کور نے آرمی چیف جنرل سید عاصم منیر کا استقبال کیا۔