سندھ اسمبلی میں قائد حزب اختلاف علی خورشیدی کا  کہنا ہےکہ کرپشن کے خاتمے کے لیے احتساب ضروری ہے۔

ایم کیو ایم اراکین کے ساتھ بہادرآباد میں پریس کانفرنس کرتے ہوئے سندھ اسمبلی میں قائد حزب اختلاف علی خورشیدی  نے کہا کہ  کل 9 دسمبر پر انسداد رشوت ستانی کا دن منایا گیا۔

علی خورشیدی نے کہا کہ  سندھ میں احتساب نہیں کرپشن کا بول بالا ہے۔ پاکستان میں کرپشن کے حوالے سے سب سے پہلے پیپلز پارٹی کا نام آتا ہے

انہوں نے کہا کہ  سندھ میں کون سا ایسا محکمہ ہے جس میں کرپشن نہیں ہے، آڈیٹر جنرل کی رپورٹس میں کرپشن کی نشاندہی ہوتی ہے۔

قائد حزب  اختلاف سندھ اسمبلی کا کہنا تھا کہ  میثاق جمہوریت میں واضح لکھا ہے کہ قومی اور صوبائی اسمبلی میں پبلک اکاؤنٹس کمیٹی کا چیئرمین اپوزیشن لیڈر ہوگا  لیکن پیپلز پارٹی کی سندھ حکومت اپنی قائد کے معاہدے پر عمل نہیں کرتی۔

علی خورشیدی کا کہنا تھا کہ  پیپلز پارٹی 16 سال سے بنا مداخلت کے سندھ میں حکومت کر رہی ہے۔ سندھ میں ہزاروں اربوں کی کرپشن ہو رہی ہے،وزیر اعلیٰ سندھ کرپشن کے خلاف جہاد کا اعلان کریں۔