وزیر بلدیات سندھ سعید غنی نے کہا ہے کہ آئندہ انتخابات میں ایم کیو ایم کو کراچی سے امیدوار نہیں ملیں گے۔

وزیر بلدیات سندھ سعید غنی نے ایم کیو ایم کے بیان پر ردعمل دیتے ہوئے کہا کہ کراچی کے اداروں کی تباہی کی ذمہ دار ایم کیو ایم ہے۔

انہوں نے کہا کہ واٹر بورڈ، کے ایم سی، کے ڈی اے، ایم ڈی اے سمیت تمام اداروں کی بربادی کے پیچھے ایم کیو ایم کا بھیانک کردار ہے، پُرامن اور روشنیوں کے شہر کراچی کو دہشگردی میں دھکیلنے والی ایم کیو ایم کس منہ سے کراچی کے مسائل پر بات کرسکتی ہے؟

ان کا کہنا تھا کہ ایم کیو ایم کی نفرت کی سیاست کو کراچی کے عوام نے دفن کردیا ہے، ایم کیو ایم ایک مردہ سیاسی گھوڑا ہے، ایم کیو ایم شدید اندرونی انتشار کا شکار ہے۔

سعید غنی نے کہا کہ ایم کیو ایم، پی ایس پی کے مکمل قبضے میں جاچکی ہے، ایم کیو ایم بتائے کہ بلدیاتی انتخابات سے کیوں راہ فرار اختیار کی تھی؟ پاکستان پیپلز پارٹی آج کراچی کی مقبول سیاسی جماعت ہے۔

وزیر بلدیات سندھ کا کہنا تھا کہ پاکستان پیپلز پارٹی نے عوامی خدمت کے ذریعے کراچی میں اپنی جگہ بنائی ہے، پاکستان پیپلز پارٹی کراچی کے مسائل کو حل کرنے مصروفِ عمل ہے، آئندہ انتخابات میں ایم کیو ایم کو کراچی سے امیدوار بھی نہیں ملیں گے۔