گوادر: وفاقی وزیر دفاع خواجہ آصف نے کہا ہے کہ نیو گوادر انٹرنیشنل ایئرپورٹ معیشت میں تبدیلی کا باعث ہوگا۔

وزیر دفاع خواجہ آصف نے نیو گوادر انٹرنیشنل ایئرپورٹ کی افتتاحی تقریب سے خطاب کرتے ہوئے کہا کہ گوادر ایئرپورٹ کا سنگ میل عبور کرنے پر سب کو فخر ہے، پاکستان کی ہوا بازی کی تاریخ میں یہ ایک اہم موقع ہے۔

انہوں نے کہا کہ سی پیک میں شمولیت کے بعد گوادر ترقی کی راہ پر گامزن ہے، نیوگوادر انٹرنیشنل ایئرپورٹ منفرد اور عالمی معیار کا منصوبہ ہے۔

خواجہ آصف نے کہا کہ نیو گوادر ایئرپورٹ کی تعمیر میں تعاون پر چین کے مشکور ہیں، نیو گوادر انٹرنیشنل ایئرپورٹ معیشت میں تبدیلی کا باعث ہوگا، تجارت اور سیاحت کو بڑھانے میں گوادر اہم کردار ادا کرے گا۔

وفاقی وزیر نے مزید کہا کہ روزگار کے مواقع پیدا ہوں گے، اقتصادی سرگرمیوں کو فروغ ملے گا اور عالمی معیار کے ایئرپورٹ کی تعمیر سے جدید سہولیات فراہم ہوں گی، گوادر ایئرپورٹ عظیم کامیابیوں کی ایک منفرد مثال ہے۔