کراچی: پاکستان نیول اکیڈمی میں 122 ویں مڈشپ مین اور 30 ویں شارٹ سروس کمیشن کورس کی پاسنگ آؤٹ پریڈ کا انعقاد کیا گیا ہے۔

پاکستان نیول اکیڈمی میں 122 ویں مڈشپ مین اور 30 ویں شارٹ سروس کمیشن کورس کی پاسنگ آؤٹ پریڈ کا انعقاد کیا گیا جس کے مہمان خصوصی پاک فضائیہ کے سربراہ ایئر چیف مارشل ظہیر احمد بابر سدھو تھے۔

چیف آف دی نیول اسٹاف ایڈمرل نوید اشرف نے مہمانِ خصوصی کی آمد پر ان کا استقبال کیا جب کہ کمیشن حاصل کرنے والے 79 افسران میں 49 مڈشپ مین اور 29 ایس ایس سی کورس کے افسران شامل ہیں۔

ایئرچیف نے کامیابی سے ٹریننگ مکمل کرنے پر کمیشنگ ٹرم اور ان کے والدین کو مبارک باد پیش کی جب کہ مہمانِ خصوصی نے نمایاں کارکردگی کا مظاہرہ کرنے والوں میں انعامات تقسیم کیے۔

سری لنکا سے تعلق رکھنے والے مڈشپ مین ویمکتھی تھیناکون نے اعزازی شمشیر جب کہ مڈشپ مین محمد شایان نے اکیڈمی ڈرک حاصل کی۔

پریڈ میں اعلیٰ سول و عسکری عہدیداران سمیت غیر ملکی مندوبین اور کیڈٹس کے والدین نے شرکت کی۔