وفاقی دارالحکومت میں مسلم معاشروں میں لڑکیوں کی تعلیم پر منعقد ہونے والی عالمی سربراہی کانفرنس کے پیش نظر 11 اور 12 جنوری 2025 کو خصوصی ٹریفک پلان مرتب کیا گیا ہے۔

کانفرنس میں 44 مسلم اور دوست ممالک کے وزرا، سفیروں اور بین الاقوامی اداروں کے نمائندے شرکت کریں گے، جس کے باعث سری نگر ہائی وے اور اسلام آباد ایکسپریس وے پر مختلف اوقات میں ٹریفک کے بہاؤ میں تبدیلیاں متوقع ہیں۔

ٹریفک پولیس حکام کے مطابق، کانفرنس کے معزز مہمانوں کی آمد و روانگی کے موقع پر سری نگر ہائی وے اور اسلام آباد ایکسپریس وے پر عارضی روٹس لگائے جائیں گے، جس کے باعث شہریوں کو سفر کے دوران معمول سے زائد وقت درکار ہو سکتا ہے۔

ٹریفک حکام کے مطابق کانفرنس کے دوران شہری 10 سے 15 منٹ کا اضافی وقت رکھ کر سفر کریں، متبادل راستوں کے استعمال پر غور کریں اور ٹریفک پولیس کی جاری کردہ ہدایات پر عمل کریں تاکہ کسی بھی قسم کی پریشانی سے بچا جا سکے۔

یہ بین الاقوامی تعلیمی کانفرنس رابطہ عالم اسلامی کے جنرل سیکرٹری محمد بن عبدالکریم العیسی کی تجویز پر منعقد کی جا رہی ہے۔ اس کا بنیادی مقصد مسلم کمیونٹیز میں لڑکیوں کی تعلیم کو درپیش چیلنجز اور مواقع پر تبادلہ خیال کرنا ہے۔

اسلام آباد میں ہونے والی اس کانفرنس کے دوران مختلف ممالک کے تعلیمی ماہرین، پالیسی ساز اور بین الاقوامی شخصیات مسلم معاشروں میں تعلیمی فروغ کے حوالے سے اپنی تجاویز پیش کریں گے۔