سندھ کے سینئر وزیر شرجیل انعام میمن نے کہا کہ آئین بنانا اور قانون سازی کرنا پارلیمنٹ کی ذمہ داری ہے، آئین  پاکستان کے مطابق پارلیمنٹ سب سے سپریم ادارہ ہے۔

سندھ کے سینئر وزیر اور پیپلز پارٹی کے رہنما شرجیل انعام میمن نے کہا چیئرمین بلاول بھٹو زرداری واضح کر چکے ہیں کہ پاکستان پیپلز پارٹی آئین کا تحفظ کرے گی۔

شرجیل انعام میمن نے کہا کہ پاکستان پیپلز پارٹی پاکستان میں آئین کی بالادستی پر یقین رکھتی ہے، صدر آصف علی زرداری نے اپنے پہلے دور حکومت میں پارلیمنٹ کو مضبوط و مستحکم کیا۔

انہوں نے یہ بھی کہا کہ پاکستان کی تاریخ میں پہلی بار صدر آصف علی زرداری نے اپنے صدارتی اختیارات پارلیمنٹ کو منتقل کئے، آصف علی زرداری نے صدارتی اختیارات میں تخفیف کی اور پارلیمنٹ اور جمہوریت کو مستحکم کیا۔

شرجیل انعام میمن کا مزید یہ بھی کہنا تھا کہ ملک کے ہر ادارے کی ذمہ داری ہے وہ پارلیمنٹ کے منظور شدہ آئین کی پاسداری کرے، جمہوریت کے استحکام اور پارلیمنٹ کی مضبوطی کے لیے جدوجہد پاکستان پیپلز پارٹی کی تاریخ رہی ہے۔