مصطفیٰ قتل کیس میں ملوث گرفتار ملزم ارمغان سے تفتیش کے دوران اہم اور تہلکہ خیز انکشافات سامنے آئے ہیں۔

پولیس کے مطابق ملزم ارمغان عادی جرائم پیشہ ہے اور ماضی میں پولیس اور اے این ایف کے ہاتھوں گرفتار ہوچکا ہے۔

تفتیشی حکام کے مطابق، ملزم ارمغان کے خلاف پہلے بھی انسداد دہشت گردی، اقدام قتل، منشیات فروشی، ڈرانے دھمکانے اور دیگر دفعات کے مقدمات درج ہیں۔

2019 سے 2024 کے دوران، ملزم ارمغان کے خلاف درخشاں، ساحل، گزری، بوٹ بیسن اور اے این ایف تھانے میں چھ مقدمات درج ہوئے ہیں۔

تفتیشی حکام کے مطابق، ملزم ارمغان نے گزری میں واقع اپنی رہائش گاہ پر غیر قانونی سافٹ ویئر ہاؤس اور کال سینٹر چلاتا رہا ہے، جہاں سے اس نے گزشتہ چند سالوں کے دوران غیر ملکی کلائنٹس کے ساتھ کروڑوں ڈالر کا فراڈ کیا۔

مزید انکشافات کے مطابق، ملزم ارمغان نے ڈیجیٹل کرنسی کی ہیرا پھیری کے لیے درجنوں ڈیجیٹل کرنسی اکاؤنٹس بنا رکھے تھے۔

گرفتاری سے قبل، ملزم نے اپنے گھر میں موجود تمام لیپ ٹاپس کا ڈیٹا ڈیلیٹ کر کے خالی کیا تھا۔ تفتیشی حکام نے بتایا کہ ملزم ارمغان نے پولیس سے چار گھنٹے تک مقابلہ کیا تھا تاکہ اپنے لیپ ٹاپس سے ڈیٹا ڈیلیٹ خالی کر سکے۔