سانحہ جعفرایکسپریس میں شہید ہونے والے لانس نائیک عثمان کی نماز جنازہ میں گورنر پنجاب سردار سلیم حیدر خان نے شرکت کی۔

گورنر پنجاب سردار سلیم حیدر خان نے شہید لانس نائیک عثمان کی نماز جنازہ میں شرکت کی جب کہ شہید کی نماز جنازہ ان کے آبائی شہر آوان پور فتح جنگ میں ادا کی گئی۔

شہید لانس نائیک عثمان کو فوجی اعزاز کے ساتھ سپردخاک کیا گیا، گورنر پنجاب نے شہید کے اہل خانہ کو دلاسہ دیتے ہوئے انہیں گلے لگا کر تسلی دی۔

گورنر پنجاب نے کہا کہ پاک فوج کے جوان اپنی جانوں کا نذرانہ پیش کرکے ہمارے بچوں کو یتیم ہونے سے بچا رہے ہیں۔ انہوں نے جعفرایکسپریس حملے کو ناکام بنانے پر پاک فوج کو خراج تحسین پیش کیا۔

سردار سلیم حیدر خان کا کہنا تھا کہ ایسے واقعات کی جتنی مذمت کی جائے کم ہے اور دہشت گردوں کا کوئی مذہب نہیں ہوتا۔ گورنر نے شہداء کے اہل خانہ کو یقین دلایا کہ وہ تنہا نہیں ہیں اور ان کا ہر ممکن تعاون کیا جائے گا۔

انہوں نے دہشت گردی کے خلاف تمام سیاسی جماعتوں کو متحد ہونے کی ضرورت پر زور دیتے ہوئے کہا کہ بھارت اور افغانستان جیسے ممالک میں دہشت گردی کے منصوبے بنائے جاتے ہیں۔

گورنر پنجاب نے مزید کہا کہ میں اور پوری قوم دہشت گردی کے خلاف جنگ میں پاک فوج کے ساتھ ہیں۔