وزیراعلیٰ پنجاب مریم نواز  نے کہا کہ اسلاموفوبیا عالمی امن اور بین المذاہب ہم آہنگی کے لیے ایک خطرہ ہے۔

وزیر اعلیٰ پنجاب مریم نواز نے انسداد اسلاموفوبیا کے عالمی دن پر  پیغام دیتے ہوئے کہا کہ دنیا بھر میں مسلمانوں کو درپیش امتیازی سلوک، نفرت اور تعصب  قابل مذمت ہے۔

 مریم نواز  نے کہا کہ اقوام متحدہ کی جنرل اسمبلی میں اسلاموفوبیا کے خلاف  قرارداد پیش کرکے پاکستان نے آواز اٹھائی، اسلام دینِ رحمت ہے جو امن، محبت، برداشت اور انسانی عظمت کا درس دیتا ہے، بدقسمتی سے اسلام اور مسلمانوں کے خلاف پروپیگنڈا کا رحجان پنپ  رہا ہے۔

وزیر اعلیٰ پنجاب کا یہ بھی کہنا تھا کہ اسلاموفوبیا کے خاتمے کی ہر کاوش کو سراہتے ہیں، اقوام متحدہ اور تمام عالمی اداے نفرت انگیز رویوں کے خلاف موثر اور یقینی اقدامات کریں، اقوام عالم کشمیر، فلسطین اور دیگر مسلمانوں کے جان، مال، حقوق اور عزت و وقار کی تحفظ کو یقینی بنائے۔

مریم نواز نے کہا کہ پنجاب حکومت مذہبی ہم آہنگی اور اقلیتوں کے احترام کو فروغ دینے کے لیے ہر ممکن اقدامات کر رہی ہے، ایسا پنجاب چاہتے ہیں جہاں ہر مذہب اور مسلک کو مساوی حقوق اور عزت حاصل ہو۔

وزیر اعلیٰ پنجاب نے مزید یہ بھی کہا کہ اسلامو فوبیا سے نمٹنے کےلیے دنیا کو اسلام کے حقیقی تشخص سے روشناس کرایا جائے، ہر قسم کی منافرت کے خلاف آواز اٹھانا ضروری ہے، پائیدار عالمی امن کےلیے سب کو اپنا کردار ادا کرنا ہوگا۔