ملک بھر میں آج عید الفطر مذہبی جوش وجذبے کے ساتھ منائی جارہی ہے۔

ملک کے تمام چھوٹے بڑے شہروں، قصبوں اور دیہات میں عید الفطر کی نماز کے اجتماعات ہوئے، لاکھوں مساجد عید گاہوں اور کھلے میدانوں میں نماز عید ادا کی گئی۔

نماز کے بعد ملک کی سلامتی، ترقی، خوشحالی اوردہشت گردی کے خاتمے کے لئے خصوصی دعائیں مانگی گئیں۔

اس کے علاوہ مقبوضہ کشمیر و فلسطین کی آزادی کے لئے بھی اللہ رب العزت کی بارگاہ میں دعا کی گئی۔

اسلام آباد کی فیصل مسجد میں نماز عید کا اجتماع ہوا، آئی جی اسلام آباد کا مسجد کا دورہ کیا اور سیکیورٹی انتظامات کا جائزہ لیا۔

پشاور کی مرکزی عیدگاہ میں بھی نمازعیدالفطر کی ادائیگی کی گئی، مساجد میں نماز عید کی ادائیگی کیلئے شہریوں کی بڑی تعداد نے شرکت کی۔

نمازعید کے بعد ملک وقوم کیلئے خصوصی دعائیں کی گئیں جبکہ نمازعید کے موقع پر سیکیورٹی کے سخت اقدامات بھی کیے گئے۔

یہ دن مسلمانوں کے لیے شکرگزاری، اخوت اور محبت کا دن ہوتا ہے، جب وہ ایک دوسرے کے ساتھ اپنے خوشی کے لمحات گزارنے کے لیے ملتے ہیں۔

عید الفطر کا دن مسلمانوں کو اللہ کی عبادات کی تکمیل پر مبارکباد دینے، اپنی کمیونٹی کے ساتھ تعلقات مضبوط کرنے اور اپنے غریب بہن بھائیوں کی مدد کرنے کا موقع فراہم کرتا ہے۔

عید کے روز مختلف علاقوں میں جشن کا ماحول ہے، بچے خوشی سے نہال ہیں اور عید کی نماز کے بعد مختلف تقریبات کا انعقاد بھی کیا جارہا ہے۔