اسلام آباد: پاکستان کو معدنی وسائل میں سرمایہ کاری کے لیے خطے کا نیا تجارتی اور معاشی مرکز قرار دے دیا گیا۔

اسلام آباد کے جناح کنونشن سینٹر میں پاکستان منرلز انویسٹمنٹ فورم 2025ء کی شاندار تقریب منعقد ہوئی جس میں وفاقی وزراء، وزرائے اعلیٰ اور اعلیٰ سطح کے ملکی و غیر ملکی مندوبین نے بھی شرکت کی۔

وزیرِ اعظم شہباز شریف نے تقریب میں مہمانِ خصوصی کے طور پر شرکت کی جبکہ آرمی چیف جنرل سید عاصم منیر نشانِ امتیاز (ملٹری) نے بطور گیسٹ آف آنر شرکت کی۔

وزیرِ اعظم شہباز شریف نے فورم سے خطاب کرتے ہوئے عالمی سرمایہ کاروں کو پاکستان میں معدنی وسائل کے شعبے میں سرمایہ کاری کی دعوت دی۔

اُنہوں نے کہا کہ پاکستان معدنی دولت سے مالا مال ملک ہے اور یہ فورم معاشی ترقی و سرمایہ کاری کے لیے انتہائی اہم ہے۔ وزیراعظم نے امریکا، چین اور یورپ سمیت دنیا بھر کے سرمایہ کاروں کو شراکت داری کی دعوت دی۔

تقریب میں مختلف اقسام کی معدنیات پر مشتمل ایک خصوصی نمائش کا بھی اہتمام کیا گیا جس میں ملکی و غیر ملکی مندوبین نے گہری دلچسپی کا اظہار کیا۔ نمائش میں پیش کیے گئے اعلیٰ معیار کے معدنی نمونوں کو خوب سراہا گیا۔

فورم سے خطاب کرتے ہوئے بیرک گولڈ کے صدر اور سی ای او مارک بریسٹو نے پاکستان کو معدنی وسائل کی دولت رکھنے والا منفرد ملک قرار دیا۔ انہوں نے کہا کہ معدنیات صنعتی ترقی اور پائیدار معیشت کے لیے ریڑھ کی ہڈی کی حیثیت رکھتی ہیں۔

فورم کے دوران مختلف ملکی و غیر ملکی اداروں کے درمیان اہم معاہدے بھی طے پائے۔ پاکستان اور چائنہ جیولوجیکل سروے کے درمیان جیو سائنٹفک ریسرچ کے لیے معاہدہ کیا گیا۔

علاوہ ازیں روسی اور جنوبی افریقی کمپنیوں کے ساتھ ڈیجیٹلائزیشن اور جدید ٹیکنالوجی کے شعبوں میں تعاون پر بھی معاہدے ہوئے۔

یہ فورم پاکستان کو معدنی وسائل میں سرمایہ کاری کے ذریعے ایک نئے تجارتی و معاشی مرکز کے طور پر ابھارنے کی جانب اہم پیش رفت ثابت ہوگا۔