اسلام آباد: وزیراعظم شہباز شریف آئندہ ہفتے 10 اور 11 اپریل کو بیلاروس کا دو روزہ سرکاری دورہ کریں گے۔

ذرائع کے مطابق وزیراعظم شہباز شریف آئندہ ہفتے 10 اور 11 اپریل کو بیلاروس کا دو روزہ سرکاری دورہ کریں گے جب کہ وزیراعظم کے ہمراہ اعلیٰ سطحی وفد، وفاقی کابینہ کے ارکان اور وزیراعلیٰ پنجاب مریم نواز بھی ہوں گی۔

دورے کے دوران وزیراعظم کی بیلاروس کے صدر الیگزینڈر لوکاشینکو سے اہم ملاقات متوقع ہے جس میں دونوں ممالک کے درمیان سرمایہ کاری، اقتصادی تعاون اور باہمی دلچسپی کے شعبوں میں شراکت داری بڑھانے پر تبادلہ خیال کیا جائے گا۔

ذرائع کا کہنا ہے کہ مذاکرات میں خاص طور پر ٹریکٹر انڈسٹری سمیت صنعتی و زرعی شعبوں میں تعاون کو فروغ دینے پر غور کیا جائے گا۔

مزید یہ کہ بیلاروس کے دورے کے بعد وزیراعظم شہباز شریف کے دورہ لندن کا بھی امکان ظاہر کیا جا رہا ہے۔

ذرائع کا بتانا ہے کہ وزیراعظم لندن میں پارٹی قائد نواز شریف کے ہمراہ ہوں گے جب کہ اس موقع پر نواز شریف اپنا طبی معائنہ بھی کروائیں گے۔