وزیراعظم پاکستان میاں محمد شہباز شریف نے اسلامی جمہوریہ ایران کے صدر ڈاکٹر مسعود پزشکیان سے ٹیلی فونک رابطہ کیا، جس میں مشرق وسطیٰ کی تیزی سے بدلتی ہوئی صورتحال اور خطے میں امن و استحکام پر تبادلہ خیال کیا گیا۔

وزیراعظم نے اس موقع پر کہا کہ پاکستان مشرق وسطیٰ کی موجودہ صورتحال پر گہری نظر رکھے ہوئے ہے اور خطے میں کسی بھی قسم کی کشیدگی سے بچاؤ کے لیے مذاکرات اور سفارت کاری کے ذریعے مسائل کے حل کو اولین ترجیح دیتا ہے۔

وزیراعظم نے اقوام متحدہ کے چارٹر، بین الاقوامی قوانین اور اسلامی تعاون تنظیم (OIC) کے دائرہ کار میں رہتے ہوئے امن کے فروغ کے لیے پاکستان کی حمایت کا اعادہ کیا۔

انہوں نے واضح کیا کہ پاکستان تمام بین الاقوامی اور علاقائی فورمز پر ایران کی اصولی حمایت جاری رکھے گا۔

ایرانی صدر مسعود پزشکیان نے کشیدہ صورتحال کے دوران پاکستان کی مسلسل، مثبت اور اصولی حمایت پر وزیراعظم شہباز شریف کا شکریہ ادا کیا۔ صدر نے خاص طور پر تنازعے کے پرامن حل کی حمایت میں پاکستان کے تعمیری کردار کو سراہا۔

دونوں رہنماؤں نے موجودہ حساس عالمی حالات میں امت مسلمہ کے درمیان اتحاد، یکجہتی اور باہمی روابط کو مزید فروغ دینے کی ضرورت پر زور دیا۔

دونوں رہنماؤں نے اس بات پر اتفاق کیا کہ چیلنجز سے نمٹنے کے لیے مسلم دنیا کو باہم مربوط اور فعال خارجہ حکمت عملی اختیار کرنی چاہیے۔