اسلام آباد: وفاقی کابینہ نے اسرائیل ایران کشیدگی میں کمی کیلئے کردار ادا کرنے پر فیلڈ مارشل سید عاصم منیر کو خراج تحسین پیش کیا ہے۔

وزیراعظم شہباز شریف کی زیر صدارت وفاقی کابینہ کا اہم اجلاس پارلیمنٹ ہاؤس کے کمیٹی روم نمبر 2 میں منعقد ہوا، جس میں آئندہ مالی سال کے بجٹ اور فنانس بل میں مجوزہ ترامیم سمیت دیگر اہم قومی امور پر تفصیلی غور کیا گیا۔

ذرائع کے مطابق اجلاس میں وزیر خزانہ نے کابینہ کو فنانس بل میں شامل مجوزہ ترامیم اور تجاویز پر بریفنگ دی۔

 اجلاس کے دوران کابینہ کو قومی سلامتی کمیٹی کے حالیہ اجلاس کے فیصلوں پر بھی اعتماد میں لیا گیا۔

کابینہ نے ایران اور اسرائیل کے درمیان حالیہ کشیدگی میں کمی کے لیے پاکستان کی کوششوں اور کردار کو سراہا جبکہ اس دوران وزیراعظم شہباز شریف، فیلڈ مارشل جنرل عاصم منیر اور نائب وزیراعظم اسحاق ڈار کی سفارتی کوششوں پر بھرپور خراجِ تحسین پیش کیا گیا۔

اجلاس کے دوران کابینہ نے پیٹرولیم لیوی کے تعین کا اختیار وزارتِ پیٹرولیم کو منتقل کرنے کی منظوری دے دی، جس سے پالیسی سازی میں مزید وضاحت اور مؤثر عمل درآمد کی راہ ہموار ہو گی۔

وفاقی کابینہ کا یہ اجلاس اہم قومی اور معاشی فیصلوں کے حوالے سے فیصلہ کن ثابت ہوا، جس میں مستقبل کی حکمتِ عملی اور معاشی سمت کا تعین بھی کیا گیا۔