پاکستان میٹرولوجیکل ڈیپارٹمنٹ کے مطابق کراچی میں یکم جون سے 4 جون تک کم شدت والے 26 زلزلے رپورٹ کیے گئے ہیں۔

زلزلے کی کم سے کم شدت  ریکٹر اسکیل پر 2.2 اور زیادہ شدت 3.5 ریکارڈ کی گئی ہے جبکہ آخری زلزلہ آج رات 2 بج کر 8 منٹ پر 3شدت کا رپورٹ ہوا۔

،پاکستان میٹرولوجیکل ڈیپارٹمنٹ کے چیف میٹرولوجسٹ عامر حیدر لغاری نے کہا کہ زلزلے کے جھٹکوں کا سلسلہ آئندہ ہفتے تک  جاری رہنے کا امکان ہے جبکہ تواتر سے زلزلے لانڈھی فالٹ لائن فعال ہونے کی وجہ سے آرہے ہیں۔

یہ بھی پڑھیں: کراچی میں زلزلوں کی لہر؛ یکم جون سے 19 جھٹکے ریکارڈ، اصل وجہ کیا؟

دوسری جانب سونامی وارننگ سیل کے سربراہ نے کہا کہ کمزور اسٹرکچر یا خستہ حال عمارتوں سے شہری دور رہیں۔

کراچی میں پہلا زلزلہ یکم جون کو شام 5 بج کر 33 منٹ پر 3.6 شدت کے ساتھ محسوس کیا گیا، جبکہ آخری زلزلہ گزشتہ شب 2 بج کر 08 منٹ پر آیا جس کی شدت ریکٹر اسکیل پر  3  تھی، زیادہ تر زلزلوں کا مرکز ملیر، کراچی کے اطراف میں تھا۔

زلزلہ پیما مرکز نے بتایا کہ زلزلوں کے جھٹکے کراچی کے مختلف علاقوں میں محسوس کیے گئے۔