شہر قائد کے مختلف علاقوں میں گزشتہ شب تھمنے والا بارش کا سلسلہ ایک پھرشروع ہوگیا ہے۔

متعدد علاقوں میں موسلا دھار بارش، موسم خوشگوار مگر شہری پریشان، سڑکیں گیلی، ٹریفک سست روی کا شکار

کراچی میں موسم نے ایک بار پھر کروٹ لی، اور آسمان پر چھائے سیاہ بادلوں نے گرج چمک کے ساتھ بارش برسنا شروع ہو گئی ہے۔

 شہر کے مختلف علاقوں میں شروع ہونے والی بارش نے جہاں موسم خوشگوار بنا دیا ہے، وہیں ٹریفک اور شہری معمولات کو متاثر بھی کیا ہے۔

بارش کا آغاز کورنگی، ملیر، شاہ فیصل کالونی، گلشن حدید، اسٹیل ٹاؤن اور اطراف سے ہوا ہے، جو دیکھتے ہی دیکھتے نارتھ کراچی، سرجانی ٹاؤن، نارتھ ناظم آباد، رزاق آباد، شاہ لطیف ٹاؤن، بھینس کالونی سمیت شہر کے بڑے حصے تک پھیل گئی۔

یہ بھی پڑھیں: اگلے 24 گھنٹوں میں کراچی سمیت سندھ بھر میں شدید بارشوں کا امکان، شہری سیلاب کا خطرہ

اسکیم 33، گلستان جوہر، گلشن اقبال، احسن آباد، گڈاپ، کاٹھور اور ایم 9 موٹروے پر بھی تیز ہوا کے ساتھ بارش ہو رہی ہے، جس سے سڑکوں پر پھسلن اور ٹریفک کی روانی متاثر ہونے لگی ہے۔

محکمہ موسمیات کے مطابق بارش کا سلسلہ آئندہ چند گھنٹوں تک وقفے وقفے سے جاری رہنے کا امکان ہے۔ شہریوں کو ہدایت کی گئی ہے کہ سفر کرتے وقت احتیاط برتیں اور غیر ضروری نقل و حرکت سے گریز کریں۔

دوسری جانب کئی نشیبی علاقوں میں پانی جمع ہونا شروع ہو گیا ہے، جبکہ متعدد علاقوں میں بجلی بند ہونے کی بھی اطلاعات موصول ہو رہی ہیں۔