پنجاب اسمبلی  میں 27 ویں آئینی ترمیم کے حق میں قرارداد کرادی گئی ہے، یہ قرارداد مسلم لیگ (ن) کی رکن حنا پرویز بٹ نے جمع کرائی ہے۔

قرارداد کے متن کے مطابق یہ ایوان 27 ویں آئینی ترمیم کی مکمل حمایت کرتا ہے، یہ ایوان سمجھتا ہے کہ یہ ترمیم ادارہ جاتی استحکام اور شفافیت کی ضامن ہے، یہ ایوان اس امر پر زور دیتا ہے کہ لوکل گورنمنٹ کو آئینی تحفظ فراہم کیا جائے تاکہ کوئی بھی اس پر شب خون نہ مار سکے۔

یہ بھی پڑھیں: پی پی ارکان کے 27ویں آئینی ترمیم پر تحفظات، حکومت سے اتحاد ختم کرنے کا مشورہ

متن میں کہا گیا کہ یہ ایوان آئینی عدالت کے قیام کے فیصلے کو خوش آئند قرار دیتا ہے، یہ ایوان قرار دیتا ہے کہ ترمیم سے عدلیہ کی آزادی اور غیر جانبداری کو تقویت ملے گی، یہ ایوان تسلیم کرتا ہے کہ صوبائی خودمختاری اور وفاقی توازن مزید مضبوط ہوگا، یہ ایوان سمجھتا ہے کہ الیکشن کمیشن کو مزید خودمختار اور مؤثر بنایا جا رہا ہے۔

قرارداد میں اس بات کا اعتراف کیا گیا کہ یہ ترمیم کوئی انقلاب نہیں بلکہ ادارہ جاتی ارتقا ہے اور وزیرِ اعظم پاکستان کو آئینی اصلاحات پر خراجِ تحسین پیش کیا گیا۔

متن  کے مطابق یہ ایوان اس عزم کا اظہار کرتا ہے کہ 27 ویں آئینی ترمیم پاکستان کے اداروں کے استحکام کا سنگِ میل ہے۔