چیف سلیکٹر اور ہیڈ کوچ مصباح الحق نے سری لنکا کے خلاف سیریز کے لیے قومی ٹیم کا اعلان کردیا ہے۔

تفصیلات کے مطا بق سری لنکا کے خلاف قومی ٹیم کی قیادت سرفراز احمد کریں گے جب کہ دیگر کھلاڑیوں میں  بابر اعظم، آصف علی ، فخر زمان،عماد وسیم، امام الحق، محمد عامر، محمد نواز، محمد رضوان ، حارث سہیل، محمد حسنین، شاداب خان ، عثمان شنواری، وہاب ریاض ، عابد علی اور افتخار احمد شامل ہیں۔

مصباح الحق نے بتایا کہ محمد نواز اور محمد رضوان بھی ٹیم میں شامل ہیں  جبکہ حسن علی کمر کی تکلیف کے باعث ٹیم میں شامل نہیں اور شعیب ملک ون ڈے سے ریٹائر ہو چکے ہیں۔

دوسری جا نب محمد حفیظ کو پاکستان کرکٹ بورڈ کی جانب سے کیریبین لیگ کھیلنے کے لیے این او سی ملا ہوا ہے۔

پاک سری لنکا سیریز کی ٹکٹوں کی آن لائن فروخت شروع ہوگئی، ٹکٹیں آج بروز (ہفتہ) سے نجی کوریئر کمپنی کے مخصوص مراکز پر بھی دستیاب ہوں گی۔

واضح رہے کہ  سری لنکا کے خلاف سیریز میں کراچی میں ہو نے والے ایک روزہ میچز کیلئے ٹکٹس کی قیمت پانچ سو سے تین ہزار جبکہ لاہور میں منعقدہ میچز کی قیمت پانچ سو سے پانچ ہزار روپے تک مقرر کی گئی ہے۔

شائقین کرکٹ نجی کوریئرکمپنی کی ویب سائٹ سے ٹکٹس خرید سکتے ہیں جبکہ کل سے مختلف کوریئر کی مخصوص شاخوں پربھی ٹکٹیں دستیاب ہوں گی

رواں ماہ ہی قومی کرکٹ ٹیم کے سابق کپتان مصباح الحق کو 3 سال کے لیے قومی کرکٹ ٹیم کا ہیڈ کوچ اور چیف سلیکٹر مقرر کردیا گیا ہے۔ وقار یونس کو قومی کرکٹ ٹیم کا بولنگ کوچ مقرر کیا گیا۔