آسٹریلیا کے جارحانہ بلے باز گلین میکس ویل نے ذہنی صحت کے مسائل کی وجہ سے ہر طرح کی کرکٹ سے غیرمعینہ مدت کا وقفہ لے لیا۔

تفصیلات کے مطابق کرکٹ آسٹریلیا نے اعلان کیا ہے کہ گلین میکسویل کچھ عرصے کے لیے کرکٹ سے بریک پر جائیں گے اور آئندہ ہونے والے میچز کا حصہ نہیں بنیں گے۔

کرکٹ آسٹریلیا کی جانب سے کہا گیا کہ گلین میکسویل اپنی ذہنی صحت کے حوالے سے کچھ مشکلات کا سامنا کر رہے ہیں۔ اس کے نتیجے میں وہ کھیل سے تھوڑا وقت دور رہیں گے۔

آسٹریلین کرکٹ بورڈ  نے سری لنکا کے خلاف آخری ٹی 20 انٹرنیشنل کے لئے گلین میکسویل کی  جگہ ڈی آرچی  شارٹ کو ٹیم میں شامل کرلیا ہے۔

خیال رہے کہ آسٹریلیا  اس وقت سری لنکا کے خلاف ٹی ٹوئنٹی انٹرنیشنل سیریز کھیلنے میں مصروف ہے۔جس کے بعد آسٹریلیا کو پاکستان کے خلاف ٹی ٹوئنٹی اور ٹیسٹ سیریز کھیلنی ہے۔

 یہ اعلان بہت سے لوگوں کے لئے صدمے کے طور پر سامنے آیا ہے جبکہ متعدد افراد نے میکسویل کے لیے نیک خواہشات کا اظہار کیا ہے۔

گلین میکسویل کی کرکٹ سے غیر معینہ مدت کے وقفے  پر سابق آسٹریلوی کوچ ڈیرن لہمن اور سابق بھارتی کرکٹر اور کمنٹیٹر ہرشا بھوگلے کی طرف سے ملے جلے رد عمل کا اظہار کیا گیاہے۔

آسٹریلین ٹیم کے سابق کوچ ڈیرن لہمن نے میکسویل کو اپنی نگہداشت کرنے کو کہا جب کہ تجربہ کار کرکٹ کمنٹیٹر ہرشا بھوگلے نے اعتراف کیا کہ انہیں خبروں میں زیادہ اچھالا گیا تھا۔