ٹی ٹوئنٹی فارمیٹ میں پے در پے شکستوں کے باوجود پاکستان ٹیم بدستور پہلی پوزیشن پر موجود ہے۔

تفصیلات کے مطابق انٹرنیشنل کرکٹ کونسل ( آئی سی سی ) نے ٹی ٹوئنٹی کی نئی رینکنگ جاری کر دی۔

تازہ ترین رینکنگ میں پاکستان ٹیم بدستور پہلے نمبر ہے جبکہ دوسرے نمبر آسٹریلیا پاکستان کی پوزیشن چھیننے کے انتہائی قریب ہے۔

سری لنکا کے بعد پاکستان کو بھی تین میچوں کی سیریز میں وائٹ واش کرنے والی آسٹریلین ٹیم 269 پوائنٹس کے ساتھ دوسرے نمبر پر ہے اور آسٹریلیا کو پہلی پوزیشن کے حصول کے لیے صرف ایک میچ جیتنا ہی ضروری ہے۔

تاہم اس کے لیے آسٹریلیا کو تین ماہ انتظار کرنا پڑے گا کیونکہ آسٹریلیا کی اگلی ٹی ٹوئنٹی سیریز فروری 2020 کے آخر  میں جنوبی افریقہ کے خلاف  شیڈول ہے۔

فہرست میں انگلینڈ تیسرے، جنوبی افریقہ چوتھے، بھارت پانچویں، نیوزی لینڈ چھٹے، سری لنکا ساتویں، افغانستان آٹھویں، بنگلہ دیش نویں اور ویسٹ انڈیز دسویں نمبر پر ہے۔

واضح رہے کہ رواں برس پاکستان نے دس ٹی ٹوئنٹی میچزکھیلے جن میں سے صرف ایک میں فتح نصیب ہوئی اور ایک میچ بے نتیجہ رہا جبکہ باقی آٹھ میچز میں اسے شکست کا سامنا کرنا پڑا۔