جارح مزاج اوپنر عمران نذیر نے کہا ہے کہ مصباح الحق کو کوچ اور چیف سلیکٹر بنایا جانا غلط فیصلہ ہے۔

ایک نجی چینل کو انٹرویو  دیتے ہوئے عمران نذیر کا کہنا تھا کہ مصباح الحق کو اچانک کوچ اور چیف سلیکٹر بنائے جانے کا فیصلہ غلط ہے۔ابتدا ءمیں انہیں انڈر 16 اور انڈر 19 کی کوچنگ دی جانی چاہیئے تھی۔

عمران نذیر کا کہنا تھا کہ کوچ اور چیف سلیکٹر سمیت کسی بھی عہدے کے لیےایک معیار مقرر ہونا چاہیئے۔کسی بھی شخص کو بیک وقت دو عہدے دیا جانا بھی درست نہیں ہے۔

ان کا مزید کہنا تھا کہ مصباح الحق کو  کوئی عہدہ دینا ہی تھا تو سلیکٹر بنا دیتے مگر کوچنگ کے لیے انہیں مزید وقت دینا چاہیئے تھا۔

ایک سوال کے جواب میں عمران نذیرنے کہا کہ میں 2009 کی چیمپئنز ٹرافی میں یونس خان  کی کپتانی کے خلاف ہونے والی سازش کا حصہ نہیں تھا۔

عمران نذیر کا کہنا تھا کہ زندگی بھر 2007 کا ٹی ٹوئنٹی ورلڈ کپ ہارنے کا افسوس رہے گا۔فائنل میں جیت کے بہت قریب پہنچ کر ہارنے کو بھول نہیں سکتا۔

واضح رہے کہ 1999 میں ڈیبیو کرنے والے جارح مزاج اوپنر عمران نذیر نے پاکستان کے لیے8 ٹیسٹ، 79ون ڈے اور 25 ٹی ٹوئنٹی  میچز کھیلے ہیں۔

عمران نذیر ون ڈے کر کٹ میں پاکستان کی جانب سے فخر زمان کے 210 اور  سعید انور کے 194 رنز کے بعد 160رنز کی تیسر ی لمبی ترین اننگز کھیلنے کا اعزاز  بھی رکھتے ہیں جو انہوں نے 2007 کے ورلڈ کپ میں زمبابوے کے خلاف کھیلی  تھی۔

عمران نذیر نے پاکستان کی جانب سے اپنا آخری ون ڈے مینچ 2009 اور آخری ٹی ٹوئنٹی میچ 2012 میں کھیلا تھا ۔

یاد رہے کہ عمران نذیر نے تقریباً پانچ برس جوڑوں کے شدید درد کی خطرناک بیماری سے جنگ لڑی ہے تاہم اب عمران نذیر ایک بار پھر کرکٹ کے میدان میں دیکھے جانے لگے ہیں۔