صوبائی وزیر بلدیات  ناصر حسین شاہ کا کہنا ہے کہ تمام انتظامات مکمل ہیں  پاکستان سپر لیگ (پی ایس ایل  5) کے میچزکراچی میں  ہی ہوں گے۔

تفصیلات کے مطابق  وزیر بلدیات سندھ ناصر حسین شاہ نے نیشنل اسٹیڈیم کراچی کا دورہ کیا اور کہا کہ کراچی میں پی ایس ایل کے میچز شیڈول کے مطابق ہوں گے۔

وزیر بلدیات سندھ نے کہا کہ کورونا وائرس سے متعلق سندھ کابینہ کی   میٹنگ ہوئی  ہے جس میں تمام پہلوؤں کا جائزہ لیا  گیا ہے۔

ناصر حسین شاہ کا کہنا ہےکہ اسٹیڈیم آنےوالوں کی تھرمل اسکریننگ  کی جائےگی جبکہ اسٹیڈیم میں فیومیگیشن بھی کی جائے گی اور ہر جگہ سینی ٹائزر  بھی رکھے  جائیں گے۔

انہوں نے تماشائیوں سے گزارش  کی کہ وہ اسٹیڈیم آئیں اور  کرکٹ کو سپورٹ کریں۔

وزیر بلدیات نے کہا کہ کورونا وائرس سے بچاؤکے لیے ہر ممکن اقدامات کیے جا رہے ہیں۔ چین،ایران، اٹلی اور دیگر ممالک سے آنے والوں کو احتیاط کرنا ہوگی۔

ناصر حسین شاہ نے مزیدکہا کہ کورونا وائرس سےمتعلق ایڈوائزری جاری کی ہے،یہ وائرس اتناخطرناک نہیں کہ مریض صحت یاب نہ ہوسکیں۔وائرس سے متاثرہ پہلا مریض صحت یاب ہو کر جاچکا ہے۔

انہوں نے کہا کہ کورونا وائرس کو لے کر کوئی سیاسی معاملہ نہیں بنانا ہے۔وزیر اعظم  عمران خان کو پھرتی دکھانا پڑے گی جیسے مراد علی شاہ دکھا رہے ہیں۔ اس وائرس کو پھیلنے سے پہلے روکنا ہے۔

وزیر بلدیات نے کہا کہ عمران خان صاحب نے کورونا وائرس کے حوالے سے کوئی اجلاس نہیں بلایا،وزیراعلیٰ سندھ لمحہ بہ لمحہ کورونا وائرس کی اپ ڈیٹ مانگتے ہیں۔