پاکستان کرکٹ ٹیم کے سابق مایہ ناز بلے باز اور شارجہ کے ہیرو جاوید میانداد بھی سابق ٹیسٹ کرکٹر سلیم ملک کے حق میں سامنے آگئے۔

تفصیلات کے مطابق پاکستان کرکٹ ٹیم کے سابق ہیڈ کوچ جاوید میانداد نے سلیم ملک کے حق میں بیان دیتےہوئے کہا کہ  سلیم ملک  کا موقف درست ہے۔

جاوید میانداد نے مزید کہا کہ  جب میچ فکسنگ کا اعتراف کرنے والے کھلاڑی واپس کرکٹ کے میدانوں میں آگئے تو سلیم ملک کو بھی موقع ملنا چاہیے۔

سابق کوچ نے کہا کہ  پی سی بی وزیراعظم کے ماتحت ہے، اس حوالے سے ان کو اپنا کردار ادا کرنے کی ضرورت ہے۔یہ بات سمجھ سے بالاتر ہے کہ آج اتنا وقت گزر جانے کے بعد اس معاملے کو اٹھایا جارہا ہے۔

انہوں نے کہا کہ  جسٹس  قیوم  ملک نے تحقیقات کی تھیں تو میں واحد آدمی تھا جو اپنی ذمہ داری چھوڑ کر اور کوچنگ کوخیرباد کہہ کر چلا گیا تھا۔ میں نے پی سی بی کو بھی اس حوالے سے سب کچھ بتا دیا تھا۔

جاوید میانداد نے کہا کہ  انصاف اسی وقت ہونا چاہیے تھا جو نہیں ہوا۔  اگر اس وقت کئی ایسے اقدامات کر لیے جاتے تو اس طرح کے واقعات دوبارہ رونما نہیں ہوتے۔

سابق کوچ نے کہا کہ   عمران خان وزیراعظم ہونے کے ناطے اپنی ذمہ داری پوری کریں۔ عمران اپنے احتساب کے نعرے پر عمل کریں اور ماضی کے کھلاڑیوں کے ساتھے ہونے والی ناانصافی دور کریں۔