لاہور: چیئرمین کرکٹ بورڈ رمیز راجا نے پی ایس ایل کی افتتاحی تقریب میں بھاری اخراجات سے روک دیا ہے۔

ذرائع کے مطابق چئیرمین پاکستان کرکٹ بورڈ (پی سی بی) رمیز راجا کا بڑا اقدام سامنے آیا اور انہوں نے پی ایس ایل سیزن 7 کی افتتاحی تقریب پر بہت زیادہ اخراجات نہ کرنے کا فیصلہ کرتے ہوئے بھاری اخراجات سے روک دیا ہے۔

ذرائع کے مطابق عالمی وبا کورونا وائرس اور کفایت شکاری کی وجہ سے تقریب سادہ ہوگی جبکہ پی ایس ایل افتتاحی تقریب کو کرٹن ریزر کا نام دیا جائے گا۔

ذرائع کے مطابق پی ایس ایل سیزن 7 کی اینتھم کے لیے بھی پی سی بی کو اسپانسر مل گیا ہے جبکہ پی ایس ایل سیزن 7 کا ترانہ 20 جنوری کو ریلیز ہونے کا امکان ہے۔

دوسری جانب پی ایس ایل سیزن 7 کی آن لائن ٹکٹوں کا اجراء شروع ہوگیا ہے جس میں شائقین کرکٹ آن لائن ٹکٹوں کی خریداری کرسکتے ہیں۔

پہلے مرحلے میں ابتدائی سات میچوں کی ٹکٹیں فروخت کے لئے آن لائن دستیاب ہیں جبکہ 17 جنوری تک پی سی بی نے ٹکٹوں کی خریداری پر خصوصی رعایت دی ہے۔

واضح رہے کہ پی ایس ایل 7 کے تمام میچز کراچی اور لاہور میں ہی منعقد کیے جائیں گے جبکہ ایونٹ کا آغاز 27 جنوری سے نیشنل اسٹیڈیم کراچی میں ہوگا اور فائنل 27 فروری کو قذافی اسٹیڈیم لاہور میں کھیلا جائے گا۔