مصباح الحق کا کہنا ہے کہ پی ایس ایل فائنل کے بعد پاکستانی ٹیم کے پاس بہت کم وقت بچے گا جس کی وجہ سے آسٹریلیا کے خلاف پاکستانی پلیئرز کی کارکردگی متاثر ہو سکتی ہے۔

پاکستان کرکٹ ٹیم کے سابق کپتان اور ہیڈ کوچ مصباح الحق کا پی ایس ایل میچز پر تبصرہ کرتے ہوئے کہنا تھا کہ پاکستان سپر لیگ (پی ایس ایل) فائنل کے بعد پاکستانی ٹیم کے پاس آسٹریلیا کے خلاف ہوم سیریز کھیلنے کے لیے بہت کم وقت بچے گا۔

انہوں نے کہا وقت کی کمی کی وجہ سے پاکستانی پلیئرز کی کارکردگی متاثر ہو سکتی ہے کیونکہ ٹی ٹوئنٹی فارمیٹ کھیلنے والے کھلاڑیوں کو فوری طور پر طویل دورانیے کی کرکٹ سے ہم آہنگ ہونے میں وقت لگے گا۔

مصباح کا کہنا تھا کہ شاہین شاہ آفریدی، بابر اعظم، محمد رضوان، شان مسعود سمیت ٹیسٹ اسکواڈ میں شامل دیگر کھلاڑیوں کو ذہنی طور پر مختصر دورانیے سے طویل دورانیے کی کرکٹ میں جانے میں مشکلات ہو سکتی ہیں جس سے لامحالہ ٹیم کی کارکردگی پر اثر پڑے گا۔

سابق کپتان کا انگلینڈ کے خلاف سیریز پر تبصرہ کرتے ہوئے کہنا تھا کہ انگلینڈ کی پوری ٹیم کورونا وائرس کی وجہ سے تبدیل ہو گئی تھی لیکن پھر بھی پاکستان ٹیم تین صفر سے سیریز ہار گئی تھی۔

ان کا کہنا تھا کہ انگلینڈ کے خلاف ون ڈے سیریز میں پاکستانی ٹیم کے کھلاڑیوں میں 15 سے 20 اوورز سے زیادہ کھیلنے کی انرجی ہی نہیں تھی۔

آسٹریلیا کے ساتھ کھیلی جانے والی ہوم سیریز سے متعلق بات کرتے مصباح کا مزید کہنا تھا کہ ہمیں سوچنا چاہیے تھا کہ پہلے ایک روزہ سیریز کھیل لیتے یا پی ایس ایل کے بعد سیریز میں تھوڑا وقفہ دے دیتے۔