پاکستان سپر لیگ ( پی ایس ایل) کے ساتویں ایڈیشن میں پاکستان کرکٹ بورڈ(پی سی بی) پر پیسوں کی عدم ادائیگی کا الزام لگانے والے جیمز فالکنر کے پی ایس ایل چھوڑنے کی اصل وجہ سامنے آگئی۔

ذرائع کے مطابق کوئٹہ گلیڈی ایٹرز کی نمائندگی کرنے والے آسٹریلوی کھلاڑی جمیز فالکنر کے پی سی بی  کے ساتھ مالی فراڈ کا انکشاف ہوا ہے۔

ذرائع کا کہنا ہے کہ پی سی بی نے جمیز فالکنر کو معاہدے کے تحت 70 فیصد ادائیگی کردی تھی تاہم  وہ رقم کی وصولی سے مکر گئے۔ بینک نے پیسے فالکنر کے اکاؤنٹ میں ٹرانسفر ہونے کی پی سی بی کو تصدیق کردی۔

مزید پڑھیے: پی سی بی سے مبینہ نالاں جیمز فالکنر کا واپسی کا فیصلہ

ذرائع کا مزید کہنا ہے کہ جیمز فالکنر دوسرے بینک اکاؤنٹ میں رقم طلب کرنا چاہتے تھے۔ پی سی بی نے پہلی ادائیگی واپس طلب کی تو فالکنر نے انکار کردیا۔

ذرائع کاکہنا ہے کہ فالکنر نے لاہور کے ہوٹل میں نشے کی حالت میں توڑ پھوڑ بھی جس کے نقصان کا ازالہ پی سی بی نے کیا۔

جمیز فالکنر نے گزشتہ روز ملتان سلطانز کے خلاف میچ کھیلنے سے بھی انکار کردیاتھا۔

واضح رہے کہ جیمز فالکنر نے پی سی بی پر پیسوں کی عدم ادائیگی کا الزام عائد کرکے پی ایس ایل سے علیحدگی اختیار کرلی ہے۔