آسٹریلوی کرکٹ بورڈ کی حکمت عملی نے پاکستان اوربھارت دونوں کو خوش کردیا ہے۔

ایک طرف آسٹریلین کرکٹ ٹیم کو دورہ پاکستان کرنا تھا تو دوسری جانب بھارت میں ہونے والا آئی پی ایل شروع ہونے والا تھا، ایسے میں آسٹریلین کرکٹ بورڈ نے اپنی حکمت عملی سے دونوں ممالک کو ہی خوش کردیا ہے۔

دورہ پاکستان کرنے والی آسٹریلین ٹیم میں کئی ایسے کھلاڑی بھی شامل تھے، جنہوں نے آئی پی ایل میں بھی حصہ لینا تھا لیکن آسٹریلین کرکٹ بورڈ کی پالیسی کے تحت وہ پاکستان کا دورہ ختم کرنے کے بعد ہی آئی پی ایل میں حصہ لے سکتے تھے۔

لہذا ایسے وقت میں آسٹریلین کرکٹ بورڈ نے بیچ کا راسہ نکالا اور اپنے تین اہم کھلاڑیوں کو آرام کے نام پر اسکواڈ سے باہر کردیا جس کی وجہ سے ان کی پالیسی بھی سرخرو رہی اوراب وہ آئی پی ایل میں بھی با آسانی شرکت کرسکیں گے۔

واضح رہے کہ ان تین کھلاڑیوں میں ڈیوڈ وارنر، جوش ہیزل ووڈ اور پیٹ کمنز شامل ہیں جو پاکستان میں ہونے والی ٹیسٹ ٹیم کا توحصہ ہوں لیکن ون ڈے ٹیم میں شامل نہیں ہوں گے۔

اس سے قبل تینوں کھلاڑیوں آسٹریلین بورڈ نے ون ڈے اسکواڈ میں بھی شامل کیا تھا لیکن اب یہ کھلاڑی آئی پی ایل کھیلنے بھارت جائیں گے۔

خیال رہے کہ ڈیوڈ وارنر کو دہلی کیپٹل، کپتان پیٹ کمنز کو کولکتہ نائٹ رائڈرز اورجوش ہیزل ووڈ کو رائل چیلنجر بنگلور نے خریدا ہے۔

یہ تینوں کھلاڑی 26 مارچ سے شروع ہونے والی انڈین پریمئر لیگ (آئی پی ایل) سیزن 15 میں نظر آئیں گے۔