اگر بابر اعظم ویسٹ انڈیز کے خلاف پہلے ون ڈے میں سنچری اسکور کرلیتے ہیں تو دو منفرد ریکارڈ ان کے نام ہوجائیں گے۔

قومی ٹیم کے آل فارمیٹ کپتان و بیٹر بابر اعظم دو منفرد ریکارڈ سے صرف ایک سنچری دور ہیں کیونکہ اگر وہ ویسٹ انڈیز کے خلاف پہلے ون ڈے میں سنچری اسکور کرلیتے ہیں تو دو منفرد ریکارڈ ان کے نام ہوجائیں گے۔

بابر اعظم سنچری بنانے کی صورت میں 2 مواقع پر لگاتار 3 سنچریاں اسکور کرنے والے تاریخ کے پہلے بلے باز بن جائیں گے۔

انہوں نے آسٹریلیا کے خلاف لاہور کے قذافی اسٹیڈیم میں ہونے والے آخری دو ون ڈے میچز میں سنچریاں اسکور کیں تھیں جس کے بعد اب انہیں یہ سنگِ میل عبور کرنے کے لیے ویسٹ انڈیز کے خلاف پہلے ون ڈے میں صرف سنچری اسکور کرنے کی ضرورت ہے۔

اس سے قبل 2016 میں انہوں نے متحدہ عرب امارات میں ہونے والے ون ڈے سیریز کے میچز میں ویسٹ انڈیز کے خلاف لگاتار تین سنچریاں اسکور کیں تھیں۔

اسی کے ساتھ ہی وہ ایک اور سنگ میل کی راہ پر گامزن ہیں کیونکہ وہ آئی سی سی مینز ورلڈ کپ سپر لیگ میں 1 ہزار رنز تک پہنچنے والے پہلے بلے باز ہیں جبکہ یہ سنگ میل عبور کرنے کے لیے انہیں صرف 98 رنز درکار ہیں۔

بابر اعظم نے سپر لیگ کے 12 میچوں میں اب تک 90 کی اوسط سے 902 رن بنائے ہیں، جس میں پانچ سنچریاں اور تین نصف سنچریاں بھی شامل ہیں جبکہ انہوں نے 158 رنز کی سب سے بڑی اننگز کھیلی ہے۔

واضح رہے کہ قومی ٹیم کے کپتان بابر اعظم کا ویسٹ انڈیز کے خلاف ون ڈے میں بھی شاندار ریکارڈ رہا ہے جبکہ انہوں نے ویسٹ انڈیز کے خلاف 89.33 کی اوسط سے 4 سنچریوں کی بدولت 536 رنز بنائے ہیں۔