پاکستان کو ہر محاذ پر تنہا کرنے کی مذموم کوشش میں ملوث بھارت نے کرکٹ بورڈ کا سربراہ بھی پاکستان مخالف کو چُن لیا ہے۔

تفصیلات کے مطابق پاکستان کی کرکٹ کو نقصان پہنچانے کی کوشش میں ہمہ تن مصروف عمل بھارت نے بی سی سی آئی پاکستان مخالف سابق کھلاڑی راجر بنی کو بی سی سی آئی کا نیا صدر منتخب کر دیا ہے۔

یہ فیصلہ ایسے وقت میں سامنے آیا ہے جب بھارت نے پاکستانی سرزمین پر ایشیا کپ کھیلنے سے انکار کر دیا ہے۔

بھارت میں مودی سرکار کی حکومت گزشتہ کئی سالوں سے پاکستان کی کرکٹ کو نقصان پہنچانے کی کوشش میں مصروف ہے، ہندوتوا نظریئے کی حامی مودی سرکار نے جنونی ہندوؤں کی خواہش پرآئی پی ایل سے پاکستانی کھلاڑیوں کی شرکت کو ممنوع قرار دیا۔

جنونی ہندوؤں نے اسی پر اکتفا نہیں کیا بلکہ انہوں نے دہشت گردی کی آڑ میں پاکستان کے کرکٹ گراؤنڈز کو انٹرنیشنل کرکٹ سے دور رکھنے کے اپنے ناپاک عزائم کا برملا اعتراف بھی کیا۔

بھارتی کرکٹ بورڈ نے گزشتہ کئی سالوں سے پاکستان کے خلاف کرکٹ کو بھارتی حکومت کے فیصلے سے منسلک کر کے اپنی جان چھڑا لی ہے۔ اور بھارتی کرکٹ بورڈ کے سربراہ بھی حکومتی فیصلوں کی آڑ لے کر معصوم نظر آتے ہیں۔

سابق سربراہ بھارتی کرکٹ بورڈ سارو گنگولی پاکستان کے ساتھ باہمی سیریز کے حق میں تھے لیکن بھارتی حکومت نے ان کی ایک نہ چلنے دی۔

اب جبکہ بھارتی کرکٹ بورڈ کے نئے سربراہ راجر بنی منتخب ہو چکے ہیں تو اس بات کا قوی امکان ہے کہ کرکٹ میں پاکستان مخالف کوششوں میں مزید تیزی آئے گی۔

واضح رہے کہ راجر بنی ہندوتوا نظریئے کے حامی ہیں اور ماضی میں وہ برملا پاکستان کے ساتھ کرکٹ تعلقات کے سخت خلاف رہے ہیں۔

واضح رہے کہ بول نیوز نے 9 اکتوبر کو بھارتی ذرائع سے یہ خبر دی تھی کہ بھارتی کرکٹ بورڈ کے نئے صدر کے لیے راجر بنی کا نام زیر بحث ہے اور امکان یہی ہے کہ راجر بنی کو سارو گنگولی کی جگہ بورڈ کا سربراہ منتخب کیا جائے گا۔