پاکستان کرکٹ ٹیم کے سابق کپتان سرفراز احمد نے نیوزی لینڈ کے خلاف کراچی میں جاری ٹیسٹ کے دوران ریکارڈ اپنے نام کر لیا ہے۔

پاکستان اور نیوزی لینڈ کی ٹیموں کے درمیان کراچی کے نیشنل بینک کرکٹ ایرینا میں ٹیسٹ میچ جاری ہے جس کے دوسرے دن کا کھیل آج کھیلا جارہا ہے۔

پاکستان نے ٹاس جیت کر پہلے بیٹنگ کا فیصلہ کیا اور پہلی اننگز میں 438 رنز بناڈالے جب کہ چار سال بعد ٹیسٹ کرکٹ میں واپسی کرنے والے سرفراز احمد نے 86 رنز بنائے۔

انہوں نے کپتان بابر اعظم کے ساتھ مل کر 196 رنز کی شراکت بھی قائم کی۔ اسی کے ساتھ ہی سرفراز احمد ٹیسٹ کرکٹ میں سب سے زیادہ رنز بنانے والے پاکستان کے وکٹ کیپر بلے باز بن گئے ہیں۔

انہوں نے کامران اکمل اور سابق کپتان معین خان کو پیچھے چھوڑتے ہوئے یہ ریکارڈ اپنے نام کیا ہے، سرفراز احمد 50 ٹیسٹ میں 2743 رنز بناچکے ہیں جس میں ان کی 3 سنچریاں اور 19 نصف سنچریاں شامل ہیں۔

Advertisement

.@SarfarazA_54 becomes the wicketkeeper-batter to score most runs in Test cricket for Pakistan👏#PAKvNZ pic.twitter.com/Uq1elRvZX6

— Cricket Pakistan (@cricketpakcompk) December 27, 2022

اس فہرست میں دوسرا نمبر کامران اکمل کا ہے جنہوں نے 53 ٹیسٹ کھیل کر 2648 رنز بنائے ہیں جس میں انہوں نے سب سے زیادہ 6 سنچریاں اور 12 نصف سنچریاں اسکور کی تھیں۔

علاوہ ازیں معین خان نے 66 ٹیسٹ میچز میں 2581 رنز بنائے تھے جس میں 4 سنچریاں اور 14 نصف سنچریاں شامل ہیں۔