پاکستان کرکٹ بورڈ کے چیف سلیکٹر محمد وسیم کو ان کے عہدے سے ہٹادیا گیا ہے۔

رمیز راجہ کے جاتے ہی پی سی بی میں اکھاڑ پچھاڑ شروع ہوگئی ہے جس میں سب سے پہلا نمبر چیف سلیکٹر محمد وسیم کا آیا۔

ذرائع کے مطابق چیف سلیکٹر محمد وسیم کا کنٹریکٹ ختم کردیا گیا ہے جب کہ انہیں ای میل کے ذریعے برطرفی سے آگاہ کیا گیا ہے۔ محمد وسیم انگلینڈ کے ہاتھوں شکست کے بعد سے تنقید کی زد میں تھے۔

مزید پڑھیں: نجم سیٹھی نیوزی لینڈ کے خلاف ٹیسٹ اسکواڈ کے اعلان سے ناخوش

ذرائع کا کہنا ہے کہ پی سی بی کے گورننگ بورڈ کو بھی تحلیل کردیا گیا جب کہ ڈومیسٹک کرکٹ کے سربراہ ندیم خان کو بھی ان کے عہدے سے فارغ  کیے جانے کا امکان ہے۔

علاوہ ازیں پی سی بی کے چیف میڈیکل آفیسر نجیب سومرو کو بھی ہٹانے کا فیصلہ کرلیا گیا ہے۔

واضح رہے کہ نجم سیٹھی نے آج سہہ پہر پی سی بی کی مینجمنٹ کمیٹی کا اجلاس طلب کر رکھا ہے۔

 یاد رہے کہ وزیر اعظم شہباز شریف نے پی سی بی کے 2019 کا آئین معطل کرکے 2014 کا آئین بحال کردیا ہے جب کہ چیئرمین پی سی بی رمیز راجہ کو عہدے سے ہٹاکر چودہ رکنی مینجمنٹ کمیٹی قائم کی گئی۔

یہ کمیٹی بورڈ کے معاملات کو چلائے گی اور 120 روز میں  نئے چیئرمین کا تقرر کرے گی جب کہ بورڈ آف گورننگ کے نئے ارکان کا تقرر بھی کمیٹی ہی کرے گی۔