قومی ٹیم کے کپتان بابر اعظم سے کپتانی پر شک کرنے والوں کو جواب دینے کے حوالے سے سوال کیا گیا جس پر انہوں نے عاجزی کا مظاہرہ کیا۔

گال انٹرنیشنل اسٹیڈیم میں کھیلے گئے دو میچز کی سیریز کے پہلے ٹیسٹ میچ میں پاکستان نے سری لنکا کو سنسنی خیز مقابلے کے بعد چار وکٹوں سے شکست دے دی ہے۔

میچ کے بعد پریس کانفرنس کرتے ہوئے جب قومی ٹیم کے کپتان بابر اعظم سے پوچھا گیا کہ کیا گال ٹیسٹ میں فتح ان کی کپتانی پر شک کرنے والوں کے لیے کوئی پیغام ہے؟

سوال پر بابر اعظم نے عاجزی سے جواب دیتے ہوئے کہا کہ میرے پاس ان کے لیے کوئی پیغام نہیں ہے جب کہ انہوں نے تسلیم کیا کہ ٹیم کے ہر فرد نے آگے بڑھ کر فتح میں اہم کردار ادا کیا ہے۔

بابر اعظم کا کہنا تھا کہ ’’اس کا سہرا ٹیم اور ان کی محنت کو جاتا ہے کیونکہ ہر کھلاڑی نے آگے بڑھ کر محنت کی اور اپنی کارکردگی سے اس میں اضافہ کیا۔ ہماری توجہ ہر سیریز میں بطور ٹیم بہتر بنانے پر ہے‘‘۔

جب محمد رضوان کے ٹیسٹ کرکٹ میں مستقبل کے بارے میں ان سے سوال کیا گیا تو رضوان کی اہمیت کو تسلیم کرتے ہوئے انہوں نے کہا کہ پلیئنگ الیون کا حتمی فیصلہ ہمیشہ موجودہ حالات پر ہوتا ہے اور ٹیم کی کامیابی کے لیے یہی بہتر ہے۔

انہوں نے مزید کہا کہ ہمیں کسی کے کیریئر کا فیصلہ نہیں کرنا ہے، رضوان بھی ہماری ٹیم کے اہم کھلاڑی ہیں۔

اگر آپ حالاتِ حاضرہ سے باخبر رہنا چاہتے ہیں تو ہمارے فیس بک پیج https://www.bolnews.com/urdu/sports/2023/07/389220/amp/ کو لائک کریں

ٹوئٹر پر ہمیں فولو کریں https://www.bolnews.com/urdu/sports/2023/07/389220/amp/ اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے کو سبسکرائب کریں   اور بیل آئیکن پر کلک کریں