انٹرنیشنل کرکٹ کونسل (آئی سی سی) نے ٹیسٹ پلیئرز کی نئی رینکنگ جاری کردی ہے۔

آئی سی سی کی جانب سے جاری کردہ نئی پلیئرز رینکنگ میں سعود شکیل، نعمان علی اور ساجد خان کی ترقی ہوئی ہے۔

قومی بیٹر سعود شکیل نے بڑی چھلانگ لگائی ہے اور وہ 20 درجے ترقی کے بعد ٹاپ بیٹرزمیں 7 ویں نمبر پر آگئے ہیں۔

نعمان علی 8 درجے ترقی کے بعد ٹاپ 10 بولرز میں شامل ہوگئے جب کہ سلمان آغا کی 6، بابر اعظم اور محمد رضوان کی ایک ایک درجے تنزلی ہوئی ہے۔

شاہین آفریدی ایک درجے تنزلی کے بعد 15 ویں نمبر پر چلے گئے جب کہ ساجد خان کی رینکنگ میں 12 درجے ترقی ہوئی۔

علاوہ ازیں ٹیسٹ بیٹرز کی رینکنگ میں جوروٹ کی پہلی پوزیشن برقرار ہے جب کہ بولرز کی رینکنگ میں بھارتی کھلاڑی جسپریت بمراہ کی پوزیشن چھن گئی ہے۔

بولرز رینکنگ میں جنوبی افریقہ کے کگیسو ربادا تین درجے ترقی کے بعد پہلے نمبر پر آگئے ہیں جب کہ آل راؤنڈرز میں رویندا جڈیجا کی پہلی پوزیشن برقرار ہے۔