راولپنڈی: سی پی او راولپنڈی خالد ہمدانی کے مطابق پی ایس ایل 10 کی افتتاحی تقریب کے لیے سیکیورٹی اور سہولتوں کے تمام انتظامات مکمل کرلیے گئے۔

سی پی او راولپنڈی سید خالد ہمدانی نے میڈیا سے گفتگو کرتے ہوئے بتایا کہ پاکستان سپر لیگ (پی ایس ایل) کی افتتاحی تقریب اور پہلے میچ کے سلسلے میں سیکیورٹی کے فول پروف انتظامات کیے گئے ہیں۔

ان کا کہنا تھا کہ سیکیورٹی کے لیے 6 ہزار سے زائد پولیس اہلکار اور ٹریفک اسٹاف کو تعینات کیا گیا ہے جب کہ شہریوں کو پُرسکون ماحول فراہم کرنے کے لیے ہر ممکن اقدامات کیے جارہے ہیں۔

سی پی او نے کہا کہ شہر کی سب سے مصروف سڑک پر بھی ٹریفک رواں دواں ہے اور شائقین کی آمد کا سلسلہ جاری ہے۔ سیکیورٹی کے معاملات میں پولیس کو رینجرز اور آرمی کی معاونت بھی حاصل ہوگی۔

انہوں نے مزید بتایا کہ گزشتہ دو برسوں میں 10 سے زائد انٹرنیشنل سیریز منعقد ہوچکی ہیں اور اس دوران تمام اداروں کے ساتھ مل کر کام کیا گیا ہے۔ تاجر برادری اور کاروباری مراکز سے مشاورت کے بعد سیکیورٹی پلان ترتیب دیا گیا ہے۔

سی پی او نے واضح کیا کہ ڈبل روڈ پر تاجروں کی سہولت کو مدنظر رکھتے ہوئے کم سے کم وقت کے لیے سڑک بند کی گئی ہے جب کہ کھلاڑیوں کو وفاقی حکومت کی جانب سے وی وی آئی پی پروٹوکول دیا گیا ہے۔

انہوں نے شہریوں سے اپیل کی کہ سیکیورٹی کے سلسلے میں پولیس سے تعاون کریں تاکہ ایونٹ کو کامیاب بنایا جاسکے۔