مائیک ہیسن کو پاکستان وائٹ بال کرکٹ ٹیم کا ہیڈ کوچ مقرر کردیا گیا ہے۔

پاکستان کرکٹ بورڈ (پی سی بی) نے نیوزی لینڈ کے سابق ہیڈ کوچ مائیک ہیسن کو قومی ون ڈے اور ٹی ٹوئنٹی ٹیم کا نیا ہیڈ کوچ مقرر کیا ہے۔

یہ تقرری پاکستان ٹیم کے محدود اوورز کے مصروف شیڈول کو مدنظر رکھتے ہوئے ٹیم میں تجربہ، تسلسل اور حکمت عملی کی مضبوطی لانے کی کوشش ہے۔

چیئرمین پی سی بی محسن نقوی نے سماجی رابطے کی سائٹ ’ایکس‘ پر خود اس فیصلے کا اعلان کیا ہے۔

انہوں نے لکھا ’’ہیڈ کوچ کی آسامی کے لیے موصول ہونے والی درخواستوں کے جائزے کے بعد یہ اعلان کرتے ہوئے خوشی محسوس ہو رہی ہے کہ سابق نیوزی لینڈ کرکٹر اور عالمی شہرت یافتہ کوچ مائیک ہیسن 26 مئی سے پاکستان کی وائٹ بال ٹیم کے ہیڈ کوچ کی حیثیت سے ذمہ داریاں سنبھالیں گے‘‘۔

یاد رہے کہ مائیک ہیسن کا پہلا امتحان بنگلادیش کے خلاف پانچ میچز پر مشتمل ٹی ٹوئنٹی سیریز ہوگا۔ مائیک ہیسن جنوبی ایشیا کی کنڈیشنز اور بڑے ٹورنامنٹس کے دباؤ سے بخوبی واقف ہیں۔

نیوزی لینڈ کی کوچنگ کے دوران اُن کی قیادت میں ٹیم نے شاندار کارکردگی کا مظاہرہ کیا تھا۔ بعد ازاں وہ آئی پی ایل میں رائل چیلنجرز بنگلور کے اسٹریٹیجک مشیر بھی رہے، جہاں انہوں نے ویرات کوہلی، اے بی ڈی ویلیئرز اور گلین میکس ویل جیسے عالمی شہرت یافتہ کھلاڑیوں کے ساتھ کام کیا۔

پی ایس ایل میں اسلام آباد یونائیٹڈ کو چیمپئن بنانے والے مائک ہیسن پاکستانی ٹیلنٹ کے ساتھ کام کرنے کا تجربہ بھی رکھتے ہیں جو اس تقرری کو مزید بااثر بناتا ہے۔

پاکستان کرکٹ بورڈ کی جانب سے یہ تقرری اس بات کی غمازی کرتی ہے کہ وہ اب ڈیٹا پر مبنی منصوبہ بندی، ٹیکنیکل لچک اور کارکردگی میں تسلسل کے لیے سنجیدہ ہے، خاص طور پر ٹی ٹوئنٹی فارمیٹ میں جہاں گزشتہ 18 ماہ کے دوران پاکستان کو کئی مشکلات کا سامنا کرنا پڑا ہے۔